Үстел теннисінен жарыс өтті
Қызылорда облысы бойынша меншікті тілші
«Қазкөліккәсіп» ҚБ-нің 30 жылдық мерейтойына орай Қызылорда станциясында үстел теннисінен жарыс ұйымдастырылды. Салалық мекемелердің спортқұмар теміржолшылары арасында өткен додаға қатысушылар жасына шектеу қойылған жоқ.
Десек те, әркімнің оң жамбасына келе бермейтін, өзіндік ерекшелігі бар спорт түрінің көпшілік арасында кең тарай қоймағандығы бұл жерде де байқалды, үміткерлер саны аздау болып, ойын бес үстел үстінде өтті. Кәсіподақ ұйымдары белсенділерінің ұйымдастыруымен таңертеңнен басталған жарыс түске қарай қыза түсті. Өйткені, дүрмекке ілесіп келгендер қатардан шығып, теннисті тұрақты ойнайтындар ғана қалған еді. Көпшілік нағыз шебер ойын өрнегіне куә болды. Үстелдің қос қапталындағы шекараларына шар түсірмей қарсыласының осал тұсын аңдып, теннис добын нысанаға түсіріп, көп ұпай жинаған шеберлер мен ептілердің бағы жанды...
– Үстел теннисі Сала кәсіподағының 30 жылдық мерейтойына орайластырылып өткізіліп отыр. Мұның алдында футбол, волейбол турнирлері Қазалы, Қызылорда станцияларында өтті. Екі спорт түрі де аймаққа кең тараған. Ойыншылар да көп болды. Бүгін, міне, үстел теннисінен жарыс мәреге жеткелі отыр. Теміржолшылар спорттық шараларға белсене қатысып, кәсіподақ тарапынан әзірленген жүлделерге қол жеткізіп жатыр, – дейді «Қазкөліккәсіп» ҚБ Қызылорда филиалының төрағасы Бауыржан Ахметов.
Түске таман финалдық жекпе-жек басталып, үш ойыншы суырылып алға шықты. Қызылорда электрмен жабдықтау дистанциясының электромеханигі Бақыт Иманалиев 3-орынға, Қызылорда бөлімшесінің инженері Талғат Сыздықов 2-орынға табан тіресе, жарыс жеңімпазы болып спорт секторы Бақытжан Имбергенов танылды. Жеңімпаздарға кубок, диплом және бағалы сыйлықтар берілді.