Жаңабаевтар отбасылық командасы ҚТЖ намысын қорғап жүр

Тараз төріндегі «Тараз-Арена» спорт кешенінде жыл сайын «Отбасы күніне» орай өтетін дәстүрлі «Бір атаның балалары футбол ойнайды» республикалық турнирі болып өтті.

Турнирге еліміздің түкпір-түкпірінен 33 команда қатысты. Биыл осымен 21 рет ұйымдастырылып отырған шараға соңғы 6 жылда үздіксіз қатысып келе жатқан Арыс станциясынан келген Жаңабаевтар командасы да қатысты. Әйгілі теміржолшылар династиясын құрайтын әулет мүшелерінен жасақталған командаға жетекшілік ететін Панзарбек Жаңабаев бүгінде зейнеткер. Қырық бес жыл Арыс белгі беру және байланыс дистанциясынан электромеханик болып еңбек еткен. Бір қызығы, бұл команда барлық жарыстарда «Қазақстан темір жолы» компаниясының өкілі ретінде қатысып жүр екен. Өйткені, теміржолшылар арасынан мұндай жанұялық команда бұрын-соңды болмаған екен.

 – Ата-анамыз теміржолшылар болған соң, өзіміз Арыста туған соң біздің теміржолшы болуымыз заңдылық деп ойлаймын. Отбасында жеті ұлмыз, жетеуміз де болат жолда еңбек етіп, нәпақамызды осы саладан таптық. Ағам екеуміз қазір зейнеттеміз. Бәріміз спортқа жақын болған соң, ағайындылар бір команда құрып, бірнеше жыл болды түрлі жарыстарға қатысып ойнап жүрміз, – дейді команда капитаны.  

Айтуынша, бүгінде Арыс станциясында 8 теміржолшылар командасы бар. Оларды осындай жарыстарға қатысуға шақырса, демеушілердің жоқтығынан, қолдың қысқалығынан бара алмай жатады екен. Ал, Жаңабаевтар жарыстарға өз қаржысымен барады. Осыны Ұлттық компанияның тиісті мамандары ескерсе дейді.  

Екі күнге созылған доп додасының алғашқы ондығына енгенімен, кейінгі ойындарда бағы мен бабы келіспей, жүлделі орындарға ілінбеген теміржолшылар командасының басты ұстанымы «Міндет жеңу емес, қатысу» екен.