Теміржолшылар арасында шағын футболдан республикалық чемпионат өтті
Собственный корреспондент по Алматинской области
Алматыда теміржолшылар кәсіподағының бірінші төрағасы Борис Егорович Шубинді еске алуға арналған шағын футболдан "ҚТЖ" ҰК" АҚ чемпионаты өтті. Іс–шара "ҚТЖ" ҰК" АҚ-ның 25 жылдығына және Кәсіподақтың 30 жылдығына орайластырылған, деп хабарлайды Rail-news.kz.
Қазақстанның барлық аймақтарынан келген 17 команда қызықты ойын көрсетті.
Ашылу салтанатында "Қазақстан теміржол, автомобиль, әуе және су көлігі қызметкерлерінің салалық кәсіптік одағы" Қоғамдық бірлестігінің төрағасы Оразғали Ахметбаев құттықтау сөз сөйледі.
Ол "Б.Шубин атындағы Кубок" үшін жарысқа қатысу - үлкен құрмет екенін атап өтті. Өйткені Борис Шубин салалық спорттың, дене шынықтыру қозғалысының дамуына баға жетпес үлес қосты.
Құрметті қонақтар арасында саланың еңбек сіңірген ардагері Қалтай Самбетов, Борис Шубиннің ұлы – Максим Шубин бар.
Үшінші және төртінші орынға Қостанай мен Жамбыл командалары таласты. Турнирде үшінші орын алған Қостанай командасы 3:2 есебімен жеңіске жетті. Маңғыстаудан келген спортшылар доп тебудің керемет техникасын көрсетіп, екінші орынға ие болды.
Бірінші орынды Қарағандыдан келген команда жеңіп алды. Дәстүрлі түрде турнирдің үздік ойыншылары анықталды. Үздік сұрмерген - атыраулық Исланбек Орынғалиев, Үздік қақпашы - Тараздан Жандос Пошта, ең ұтымды ойыншы - Дауылбай Қожаниязов, ең белсенді ойыншы-Шымкенттен Абылай Эбилхайыр және Павлодардан Ризабек Жұмабеков ең перспективалы ойыншы деп танылды.
Жеңімпаздар мен жүлдегерлер кубоктармен, медальдармен және бағалы сыйлықтармен марапатталды. "ҚТЖ" ҰК" АҚ-ның 25 жылдығына арналған мерекелік медальдармен Қарағанды, Маңғыстау, Ақтөбе, Қостанай және Достық спорт нұсқаушылары марапатталды.