Теміржол мекемелері арасында дойбы, дартстан сайыс өтті
Тараз қаласы бойынша меншікті тілші
Белгіленген кестеге сәйкес Шу станциясындағы теміржол мекемелері арасында дойбы мен дартстан сала кәсіподағының 30 жылдығына арналған жарыс өтті.
Тораптық станциядағы он шақты теміржол мекемелері қатысқан сайыста спорт десе жанын салатын теміржолшылар барын салды. Дойбыдан шебер ойын үлгісін көрсеткен Шу белгі беру және байланыс дистанциясының электромеханигі Атқар Надыргужин бірінші орын алса, Шу жол дистанциясының қауіпсіздік және еңбекті қорғау жетекші инженері Ерболат Қуантаев екінші, Шу электрмен жабдықтау дистанциясы бөлім басшысы Ерлан Әблезов үшінші орынды иеленді.
Ал дартс бойынша Шу электрмен жабдықтау дистанциясының электромонтері Абсамат Нұргелді бірінші, Шу белгі беру және байланыс дистанциясының электромеханигі Медет Төлепбергенов екінші, Шу белгі беру және байланыс дистанциясының электромеханигі Атқар Надыргужин үшінші орынды иеленді. Барлық жеңімпаздар кәсіподақ тарапынан марапатталды.