Шағын футболдан іріктеу ойыны өтті
Атырау облысы бойынша меншікті тілші
Жуырда теміржолшылардың жақсы көретін спорт түрі – шағын футболдан Кәсіподақтың 30 жылдығына орай Атырау өңіріндегі темір жол мекемелері арасында іріктеу ойыны өтті.
Жарысқа 5 команда қатысты. Олар – Атырау және Мақат локомотив пайдалану депосы, Мақат станциясы, Әскерилендірілген күзет және Транстелеком командалары. Ә дегеннен қызу басталған ойында барлық командалар жақсы дайындықпен келгендерін байқатты. Қарсыласына ұпай бермеуге тырысқан командалар бір-біріне дес бермей, қызу тартысқа түсті.
Жарыстың аты жарыс, бір ойында жеңілсе, екінші ойында қарсыласын ойсырата жеңді. Аймақта шағын футболдан ғана емес, спорттың барлық түрінен жүлдені бермейтін мықтылар бұл жолы да қара үзіп алға шықты. Бірінші орынды Атырау локомотив депосының командасы жеңіп алды. Екінші орынды Транстелеком командасы иеленсе, үшінші орын Мақат станциясының ойыншыларына бұйырды. Сөйтіп, жеңімпаз Атырау локомотив депосы футбол командасы Ақтөбе қаласында өтетін келесі іріктеу ойынына жолдама алды.