Республика күніне орай ардагерлер арасында спорттық сайыс өтті
Абай облысы бойынша меншікті тілші
Ел шығысындағы теміржолшылар қайта оралған Ұлық мерекені есте қаларлықтай елеулі оқиғалармен атап өтті. Семей бөлімшесінің кәсіподақ ұйымы мен ардагерлер ұйымы бірлесіп спорттық шаралар ұйымдастырды.
Көпшілікті күнтізбеге қайта енген ұлттық мерекемен құттықтаған бөлімше басшысы Владимир Бабиченко еңбек жолын отандық теміржол көлігінің дамуына арнаған ардагерлер қауымы әрдайым назарда екенін айтып өтіп, бүгінгі шараны ұйымдастырып отырғандарға алғыс айтты.
Спорттық сайысқа қатысуға 25 ардагер тілек білдіріпті. Өзара үш топқа бөлінген қарт теміржолшылар спорттың шахмат, дартс және үстел теннисі түрінен білек сыбанып, сайыс жолына шықты. Әрқайсысы өзіне ыңғайлы спорт түрін таңдаған ардагерлер түс ауғанша сайыс көрігін қыздырды. Үш бірдей алаңдағы сайыс саябырлаған соң ғана «Локомотив» спорт клубының нұсқаушысы Наталья Мешкова бастаған қазылар алқасы жеңімпаздарды жария етті. Жүлделі орынға ие болған ардагерлерді бөлімше басшысы Владимир Владимирович пен кәсіподақ төрағасы Алик Тұрсынұлы марапаттап, ақшалай сыйлықтар табыс етті.
Ардагерлер арасынан мергендік сынға түскен дартс ойынында Семей станциясының зейнеткері Ерғазы Жұмагелдин бас бәйгені еншіледі. Ал үстел теннисінен байырғы қозғалысшы Серік Абижанов бірінші орын алды. Шахматтан бас жүлде ардагерлер ұйымының төрағасы, Құрметті теміржолшы Қырықбай Әлсейітұлына тиесілі болды. Екінші және үшінші орын алған зейнеткерлер де сый-сияпатсыз қалмады.