Жамбылдық теміржолшылар арасында шахмат ойыны жақсы дамыған

Жамбыл вагон жөндеу депосының ұжымы мекемеде ұзақ жыл вагон қараушы болып еңбек еткен ардагер, марқұм болған әріптестері Виталий Соколовты еске алуға арналған спорттық шара өткізді.

«Виталий Соколов кәсіби теміржолшы болумен қатар шахматты жанындай жақсы көрген ойыншы еді. Бірнеше республикалық және облыстық біріншіліктерде топ жарып, кәсіпорынның абыройын көтерді», – деп еске алды спорттық шараның ашылуында сөз сөйлеген депо директоры Талғат Советұлы.  

Ойшылдар ойынында Ревизорлық бақылау аппараты басшысының орынбасары Дархан Құндызбеков әріптестерін ойсырата ұтып, жүлделі бірінші орынды иемденді. Вагон қараушы Андрей Швалев екінші орны алды. Ал дойбы жарысынан вагон қараушы Ерлан Оразанның мерейі үстем болды. Екінші орынды кадрлар бөлімінің менеджері Баян Қонысбаев, үшінші орынды нұсқаушы Рахман Құдайберген алды. Үстел теннисі ойынында вагон қараушылар – Әміржан Байжан бірінші орын, Есеналы Пияев пен Әуезхан Жаскіленов екінші және үшінші орындарды өзара бөлісті. Барлық жүлделі орын иелері қаржылай сыйлықтарға ие болып, Алғыс хат алды.

Айта кету керек, жамбылдық теміржолшылар арасында шахмат ойыны қатты дамыған. Қай мекемеде болсын ойшылдар ойынында осалдар жоқ. Тараз темір жол көлігі оқу орталығында өткен шахмат жарысы да кіл мықтыларды танытты. «ЖамбылРемСервис» ЖШС тауар қабылдап-жөнелтуші Досбол Түймебек бірінші, Жамбыл электрмен жабдықтау дистанциясы өндірістік оқыту шебері Марат Кұлбаев екінші және Жамбыл локомотив пайдалану депосының ардагері Виктор Устинов үшінші орынды иеленді.