Ақтөбелік теміржолшылар ұлттық ойындарды жаңғыртты
Ақтөбе облысы бойынша меншікті тілші
Көрісу күні құрметіне Ақтөбе станциясының теміржолшылары ұлттық спортты жаңғыртып, асық ату мен тоғызқұмалақтан жарыс өткізді.
Спорттық шараға Ақтөбе станциясынан бөлек Қандыағаш және Шалқар станциясының түрлі мекемелерінен жалпы саны 55 қызметкер қатысты. Олардың бәрі де салауатты өмір салтын ұстанып, спортты серік етіп жүрген теміржолшылар. Дей тұрғанмен, ұлттық ойындардан алғаш рет бақ сынап жатқандар да кездесті. Футбол мен волейболдың шебер ойыншылары асық атудың әліппесін үйреніп, шахматшылар тоғызқұмалақтан бақ сынап, жалпы сайыс қызық әрі танымдық тұрғыда өтті.
«Басты мақсат – теміржолшылар арасында салауатты өмір салтын насихаттап, байланысты нығайту әрі ұлттық құндылықтарды дәріптеу. Жүлделі орын алғандар кәсіподақ демеушілігімен түрлі марапаттарға ие болды», – дейді бөлімшенің спорт нұсқаушысы Нұргүл Батырхан.
Командалық жарыста бірінші орын Шалқар командасына, екінші орын Қандыағаш теміржолшыларына, ал үшінші орын Ақтөбе магистральдық желі бөлімшесінің қызметкерлеріне бұйырды.