Бейнеуде шағын футболдан жарыс өтті
Маңғыстау облысы бойынша меншікті тілші
Бейнеулік теміржолшылар көктемді түрлі спорттық шаралармен бастады. Өткен апта Амал мерекесіне орай шағын футболдан жарыс өтті.
Сегіз команда бақ сынасқан бәсеке ә дегеннен көтеріңкі көңіл-күймен қызықты және тартысты басталды. Ақтық сынға шыққан Маңғыстау магистральдық желі бөлімшесінің құрама командасы мен Бейнеу жол дистанциясының командасы өте тамаша ойын өрнегін көрсетіп, бөлімше жігіттері басым түсіп, бірінші орынды иемденді. Жолшылар екінші, ал Бейнеу станциясының командасы үшінші орынға табан тіреді. Жеңімпаздар кубок, дипломдармен марапатталды. Иса Құрбанбаев «Үздік ойыншы» атанса, Рахметулла Башпалаев «Үздік қақпашы» номинациясына ие болды.
Жағымды жаңалық, Бейнеу станциясынан спорттық жаттығу залын ашу қолға алынып жатыр екен. Ол үшін Бейнеу айналым депосының демалыс үйі ғимаратынан орын дайындалуда, керекті спорттық жабдықтың біразы Маңғыстау станциясынан жеткізілген. Жуырда Бейнеу торабы бойынша спорт нұсқаушысы болып жұмысқа қабылданған Бегзад Нұрәлиев осы жұмыстармен айналысуда. Айтпақшы, кешегі өткен жарыс оның алғашқы ұйымдастырған жұмысы көрінеді.