Шалқар станциясында отбасылық сайыс өтті
Ақтөбе облысы бойынша меншікті тілші
«Әкем, анам және мен». Шалқар станциясы теміржолшылары арасында осындай атаумен спорттық сайыс өтті. Аты айтып тұрғандай отбасымен сайысқа түскен теміржолшылар бәсекесі қызу әрі қызықты өрбіді.
Шараға Шалқар станциясындағы барлық темір жол мекемелерінен белсенді отбасылар қатысты. Сайыс WorldAthletics-тің келесідей ережелері бойынша ұйымдастырылды: жіппен секіру, айқаса секіру, допты лақтыру, найза лақтыру, формула-1 эстафетасы, ілесе секіру, тосқауылмен жүгіру және джампингтен белсенділік сыналды.
Біріне бірі дес бермей, бірін бірі басып озып, артық ұпай жинауға тырысып жанталасқан отбасылар, оларға демеушілік жасап қиқуға басқан жанкүйерлер де бұл күні бір серпіліп қалғаны анық.
«Кәсіподақ ұйымы тарапынан спорттық шаралар тұрақты өткізіліп тұрады. Сәуір айында спорттың жеңіл атлетика түрінен де отбасылық жарыс өткізген едік. Әрбір спорттық шара – ұжымдық ауызбіршілік пен салауатты өмір салтын қолдауға бағытталған. Теміржолшылар мекемеде ғана емес, отбасыларымен тығыз байланыс орнататын болады», – дейді аймақтық спорт нұсқаушысы Нұргүл Батырхан.
Тартысты өткен сайысқа төрешілік жасағандарға да жеңімпаз жанұяны анықтау оңайға соққан жоқ. Бір-екі ұпаймен алға шыққан Шалқар станциясы бастығының орынбасары Дауылбаевтар жанұясы бас жүлдеге лайық болды.
Екінші жүлделі орынды әскерилендірген теміржол күзеті мекемесінің қызметкері алса, үшінші орын вагондарға техникалық қызмет көрсету пункті қызметкері Ермағамбетовтер отбасына бұйырды.