Отбасылық сайыс өтті

1 маусым – Халықаралық балаларды қорғау күні қарсаңында «Қамқор Локомотив» ЖШС «Астана локомотив жөндеу депосы» филиалының жұмысшылары мен олардың балалары арасында «Әкем, анам және мен – спортшылар отбасы!» жарысын өткізді.

Елорданың «Көктал» саябағында өткен мерекелік іс-шараға «Қамқор Магистраль» кәсіподақ бірлестігі мен Астана қаласына қарасты Сарыарқа ауданы әкімдігінің ішкі саясат және әлеуметтік саласы бөлімі қолдау көрсетті.  

Жарысқа Астана локомотив жөндеу депосының жұмыскерлері мен олардың 7-9 жас аралығындағы балаларынан құралған 6 команда қатысты. Әрбір отбасылық командаға арнайы дайындалған түрлі-түсті әдемі футболкалар мен бейсболкалар таратылды. Ойынға қатысушы ата-аналар мен балаларды «Қамқор Локомотив» ЖШС техникалық директоры Жанатбек Адамбаев пен «Қамқор Магистраль» кәсіподақ ұйымының төрағасы Светлана Байқадамова құттықтап, оларға сәттілік тіледі. Командалар тапқырлық пен ептілікті, шапшаңдық пен табандылықты талап ететін әртүрлі тапсырмаларды орындап, көңілді және тартысты ойын көрсетті. Ата-аналар балаларымен бірге балаша қуанып, қайта оралмас балдәурен шақтарына саяхат жасап қайтқандай болды. Мерекеге арнайы шақырылған мультфильм кейіпкерлерінің костюміндегі аниматорлар балалар қуанышын еселеп, есте қаларлық тамаша күй сыйлады.  

Спорттық жарыстың ең кульминациялық сәті – марапаттау кезеңі болды. «Қамқор Локомотив» ЖШС жарысқа қатысушы отбасыларға ғана емес, сондай-ақ жанкүйер болып келген теміржолшылардың балаларына да сыйлық таратты. Сайыстың аты сайыс болғандықтан, алты команданың арасынан асығы алшысынан түсіп, топ жарған отбасы да болды. Ол – Мұхтар Сапаралиннің «Бәйтерек» отбасылық командасы. Барлық тапсырмаларды ойдағыдай орындап, бірінші орын мінберінен табылған командаға сыйлыққа велосипед табыс етілді. Ойынға түскен бес отбасылық команданың қатысушылары Мұрат Барқаев, Қолқанат Қарабалаев, Жайнагүл Хамза, Бота Бейсембаева, Жанар Хасенбаеваға қазылар алқасының қорытындысы бойынша «Ең тапқыр отбасы», «Ынтымақты отбасы», «Креативті отбасы», «Мықты отбасы», «Мерейлі отбасы» номинацияларымен дипломдар және сыйлыққа самокаттар табысталды. Ал кәсіподақ бірлестігі атынан Светлана Байқадамова жарысқа қатысушы ата-аналарға ақшалай сыйлық табыс етті.