Ұлттық ойындар айлығы басталды
Абай облысы бойынша меншікті тілші
Шығыстағы теміржолшылар қауымы жазғы маусымды ұлттық ойындар айлығымен бастады. Игілікті шараның бастамашысы – жергілікті кәсіподақ ұйымының белсенділері.
Ұлттық ойындар шеруі ең алдымен халқымыздың дәстүрлі тоғызқұмалақ ойынымен басталды. Айта кетерлігі сол, аймақтағы тәрізді семейлік теміржолшылар арасында да тақталы ойын түрі кеңінен танымал болып келеді. Ал оны ұйымдастырудағы басты мақсат әсіресе жас буын арасында тоғызқұмалақ ойынын насихаттау, халқымыздың төл өнері мен спортын дамыту.
Бөлімше бойынша тоғызқұмалақшылар аса көп болмағанымен жақсы ойнайтын теміржолшылар бар болып шықты. Сондықтан да қатысушылар ерлер мен әйелдер ретінде екі топқа бөлініп, өзара жарыс көрігін қыздырды.
Тоғызқұмалақ – байыптылық, байқампаздық пен дәл есептеу сынды қасиеттер сынға түсетін, логикаға негізделген ерекше ойын. Зияткерлік қабілетті дамытатын тақталы ойын барысында ойлау қабілеті жүйріктер ғана топ жарды.
Атап айтсақ, ерлер арасында ПЧ-39-дан келген Аслан Толымхан бірінші орын алса, ПЧ-40 ойыншысы Нұрбек Қалиев екінші орын алды. Үшінші орын ЭЧ-18 ойыншысы Сұлтан Төлеуханға бұйырды.
Сол тәрізді тоғызқұмалақ ойыны әйелдер арасында да мейлінше тартысты өрбіді. Бұл орайда бірінші орынды «Қазтеміртранс» АҚ Семей филиалынан келген Айгерім Тоқпанова иеленді. Ал екінші және үшінші орындарды салалық кәсіподақ ұйымының қызметкерлері Данагүл Өтеленова мен Сәуле Асқарова бөлісті.
Тоғызқұмалақ Семей теміржолының тарихында тұңғыш рет ұйымдастырылып отыр. Сондықтан болар әсері де ерекше болды.
Ойынның соңында бөлімшенің кәсіподақ төрағасы Алик Досанов пен спорт нұсқаушысы Наталья Мешкова жеңімпаздарға бағалы сыйлықтар мен грамоталар табыс етті.