«Нұрлы жол» вокзалында спорт зал ашылды
«Қазақстан теміржолшысы» газетінің тілшісі
«Нұрлы жол» вокзал кешенінде қызметкерлерге арналған спорт зал ашылды. Кешеннің 6-шы қабатында орналасқан спорт залда спортпен шұғылданамын деген адамдарға барлық жағдай жасалған.
Атап айтқанда, түрлі тренажерлар, фитнеске арналған жүгіру жолдары, боксқа арналған құрылғылар, әр түрлі салмақтағы дискілері бар штангалар бар. Вокзал кәсіподағының төрағасы Бейімбет Ұласбектің айтуынша, жабдықтардың көбін Кәсіподақтың Орталық аппараты алып берген.
– Спорт – жаман әдеттерден сақтайтын, салауатты өмір салтын ұстанудың негізі. Денсаулықты сақтауға және жақсартуға көмектеседі. Салауатты өмір салты міндетті түрде позитивті ойлауды, белсенді өмірлік ұстанымды, өмірде рухани үйлесімділікке қол жеткізу қабілетін арттырады. Спорт – бұл әрқашан дені сау және өз денесін жақсы ұстағысы келетіндер үшін қажеттілік. Осындай жандар біздің теміржолда, соның ішінде вокзалда өте көп. Бұл залда қызметкерлер жұмыстан тыс кезде келіп, спортпен айналысатын болады, дейді Б.Ұласбек. Ол сондай-ақ жақында ерлер мен әйелдерге арналған душ кабинет те пайдалануға берілетінін жеткізді.