Теміржолшылардың кәсіби мерекесіне орай спорттық сайыс өтті

Қызылорда магистральдық желі бөлімшесінде қол күресі, кіші теннис және дәлдікті көздеу-дартс ойыны түрлерінен өткен спорттық сайыс алдағы теміржолшылардың кәсіби мерекесіне арналды.

Бес команда қатысқан жарысты бөлімшенің кәсіподақ ұйымы ұйымдастырып, демеушілік жасады. Бір мезетте бірнеше спорт түрінен өткізілген жарыс командалардың спорттың барлық түріне шеберлігін де сынға салған шара болды. Өйткені, ойыншылар арасында бірінен екіншісіне оңай ауысып, қос-қос жүлде алып жатқандар қатары аз болмады. Бірі ойынды кәсіби дәрежеде алып жүрсе, енді бірі осалдық танытып жатты. Жарыс болған соң жеңіс пен жеңіліс қатар жүретіні мәлім, дегенмен жеңіске ұмтылған командалар тартысты да шиеленісті ойын көрсетті.  

Жалпы жарыс магистральдық желі бөлімшесі бойынша өткізілгендіктен кей жарыстарда ұпай командалық есеппен саналып нәтижеленуде, ал кей түрінен жекелей сын жасалды. Кіші теннистен жекелей сында «НЖС» командасынан Бауыржан Төлегенов 1-орын, «Норпож» құрамасының өрт сөндірушісі Дулыға Ахметов 2 орын иемденіп жүлде алды. Ал жарыс соңында барлық құрамалар арасында асығы алшысынан түскен Қызылорда магистральдық желі бөлімшесінің жеке құрамы «НЖС» жүлделі 1-орын алды. Өрт сөндіру пойызының «Норпож» құрамасы 2-орынды иемденсе, жүлделі 3-орынды құрылыс және жөндеу бригадасының «РСБ» командасы қанағат тұтты.  

Әріптестеріне қолдау білдіріп келген бөлімше директоры Ибраким Басықараев баршаны алдағы кәсіби мерекемен құттықтап, салауатты өмір салтын ұстанып, ұжымды ұйытуға септік ететін спорттық ойындарда бәрі де жеңімпаз деп жариялады. Ажар Ерманова басқаратын кәсіподақ ұйымының белсенділері спорттық шараның ойдағыдай өтуіне бар жағдайды жасап, жүлдегерлерді бағалы сыйлықпен, кубок, дипломмен марапаттады.