Велошабандоз Жамбыл өңіріндегі сапарын Шу – Мойынты телімінің 70 жылдығына арнады
Тараз қаласы бойынша меншікті тілші
Ақтөбеден жолға шыққан велошабандоз, ардагер-теміржолшы Жұмабай Отарғалиев көне шаһар Тараз қаласына келіп жетті. Тараз вокзалында ардагерді жергілікті теміржолшылар күтіп алып, ас-суын алдына тосты.
Ақтөбеден жолға шыққан велошабандоз, ардагер-теміржолшы Жұмабай Отарғалиев көне шаһар Тараз қаласына келіп жетті. Тараз вокзалында ардагерді жергілікті теміржолшылар күтіп алып, ас-суын алдына тосты.
Велошабандоз қария өзінің биылғы миссиясы Бейбарыс Сұлтанның 800 жылдығына арналып отырғанын тілге тиек етті. Ағымдағы жылы Жамбыл бөлімшесінде де атаулы даталар баршылық. Ең бастысы Шу – Мойынты телімінің іске қосылғанына 70 жыл. Одан бөлек Сарышаған станциясы да 70 жылдығын атап өткелі жатыр. Жалпы, биылғы жылы Әулиеата – Бішкек телімінің құрылысы басталғанына 100 жыл толып отыр екен, бұл атаулы даталарды бөлімше күзде атап өткелі отыр.
Бұл жаңалықты естіген велошабандоз өзінің бағытын өзгертетінін айтты.
«Ендігі бағытым Алматы еді, сондықтан мынандай атаулы даталарды атап өткелі отырған Жамбыл бөлімшесіне қарасты біраз станцияларға ат басын бұрып, Жамбыл жеріндегі миссиямды Шу – Мойынты телімінің 70 жылдығына арнағым келді», – деді ол.
Сөйтіп, қария ендігі бағытын Тараз – Түркісіб – Шу – Сарышаған – Мойынты телімдері бойынша өзгертті.
Тараз қаласында бір күн тыныққан ардагер велошабандозшыны жамбылдық теміржолшылар вокзал маңындағы іргелі ескерткіштердің біріне айналған паровоздың жанынан сәтті сапар тілеп шығарып салды.