Жолшылар жеңіс тұғырынан көрінді
Атырау облысы бойынша меншікті тілші
Атырау аймағында соңғы екі апта бойы көлік қызметкерлері күніне орай спорттың әр түрінен жарыстар өтіп жатыр. Жуырда кәсіподақ ұйымының қолдауымен өңір теміржолшылары арасында шағын футболдан өткен сайыс қызықты өтті.
Жарысқа аймақтағы «сен тұр, мен атайын» деген кілең мықтылар, 4 команда қатысты: Атырау электрмен жабдықтау, белгі беру және байланыс дистанциялары мен жол дистанциясынан екі команда құралды. Төрт команда да мықты ойын көрсетіп, бірін-бірі жеңе алмай ұзақ арбасты, бір-біріне оңайлықпен беріле қоймады. Ұпай жіберіп алғаны қарымта қайтару үшін шабуылды үдетіп, жаңа ойын тәсілдерін қолдануға көшеді. Оған жанкүйерлер де дем беріп, жасыл алаңды қиқумен жаңғыртып жатты. Ұзаққа созылған ойынның соңғы шешуші кезеңінде ғана жеңіс қарсыластарынан айласын асырған жолшылар командасына тиесілі екені белгілі болды. Ал энергетиктер мен байланысшылар 2 және 3 орындарды бөлісті. Жеңімпаз командалар турнир кубогымен, диплом және ақшалай сыйлықпен марапатталды.
