Теміржолшы әулеті республикалық турнирде жеңімпаз атанды

Алматыда «Отбасы күніне» орай «Бір атаның балалары футбол ойнайды» республикалық турнирі өтті. Дәстүрлі түрде жыл сайын өткізіліп келе жатқан спорттық шарада биыл теміржолшылар әулеті топ жарды.  

Арыс станциясынан келген Жаңабаевтар командасы республикалық турнирге осымен жетінші рет қатысып отыр және жеңіс тұғырынан көріне білді. Әйгілі теміржолшылар династиясын құрайтын әулет мүшелерінен жасақталған командаға жетекшілік ететін Панзарбек Жаңабаев бүгінде зейнеткер. Қырық бес жыл Арыс белгі беру және байланыс дистанциясынан электромеханик болып еңбек еткен. Сол кісінің бастамасымен 2016 жылы теміржолшылар әулетінің командасы құрылған. Содан бері спорттық додаларға тұрақты түрде қатысып келеді.

Қыркүйектің 9-10 күндері аралығында өткен республикалық турнирде еліміздің әр түкпірінен келген 24 команда шағын футболдан бақ сынасып, кім мықтыны анықтады. Жарыстың шарты бойынша турнирге тек бір атадан тараған әулеттің мүшелері қатыса алады. Аталған турнир осымен 22-ші рет ұйымдастырылып отыр.

Жаңабаевтар әулеті бұған дейін сайысқа қатысқанымен, жүлдегерлер қатарынан көріне алмапты. Осы жолы жақсы дайындықпен келіп, жеңіске қол жеткізді.

Топтық сайыста теміржолшылардан құралған Жаңабаев командасы екі команданы қиындықсыз ұтты. Одан кейін былтырғы күміс жүлдегер Базарбаевтар командасымен кездесті. Бұл ойын өте тартысты болды және ойын қорытындысы бойынша есеп 1:1 ұпайымен аяқталды. Пенальтиде 4:3 есебімен теміржолшылар әулеті ұтып кетті.   Ширек финалда былтыр жеңімпаз болған Мұхтар ата командасымен бақ сынасты. Оларды 2:0 есебімен ұтып, финалға шыға білді. Шешуші сайыста Нұрсейітовтер командасымен кездесіп, оларды да 2:0 есебімен ұтып, осы турнирдің жеңімпазы атанды.

Команданың жетекшісі Панзарбек Жаңабаев теміржолшылар атынан шығып жүрген командаға ҚТЖ тарапынан қолдау болса деген ойын білдірді. Өйткені отбасылық жарыстар еліміздің әр түкпірінде өтеді, оған бару жолы, тұратын жердің қаражаты команда мүшелеріне ауыртпашылық етеді. Осы жағынан Ұлттық компания қолдау білдірсе деген өтініші бар.

«Арыс қаласында теміржолшылар әулетінен құралған сегіз команда бар. Өз арамызда ойын ұйымдастырып тұрамыз. Дегенмен, олар республикалық жарыстарға қатыса алмай отыр, ҚТЖ атынан шығып жүргендіктен қолдау болса дейміз. Біздің отбасыда жиырма теміржолшы бар, бәріміздің еңбек өтілімізді қоссақ 500 жыл. Бәріміз жастайымыздан футбол ойнап, спортпен шұғылданамыз. Жарыстың бәріне өз қаржымызбен барып, қатысып жүрміз», – дейді Панзарбек Жаңабаев.

Спортты серік еткен П. Жаңабаев түрлі спорттық шараларға, марафондарға да қатысып тұрады. Былтыр ҚТЖ ұйымдастырған марафонға қатысып, арадагерлер арасында үшінші орынды жеңіп алған.  

«Үнемі спортпен шұғылданамын. Қыркүйектің 23-де Астанада ҚТЖ-ның марафоны өтеді, қазір соған дайындалып жатырмын. Наурызда Өзбекстанда өткен марафонға қатыстым. Түркістан қаласында да марафон өтіп тұрады. Балам мен немеремді ертіп алып аймақтағы марафоннан қалмаймын», – дейді теміржолшы.