Шалқарда теміржолшылар арасында спорттық ойындардан сайыс өтті
Ақтөбе облысы бойынша меншікті тілші
«Әскерилендірілген темір жол күзеті» ЖШС Ақтөбе филиалы ұжымы спорт ойындарының үш түрінен турнир өткізді. Шара отыз жылдан аса уақыт өмірін темір жол бойын күзетуге арнап, атқыштар бригадасын басқарған Құлетов Аманғали Ордаұлын еске алуға арналды.
Турнир Шалқар теміржол мекемелерінің командалары арасында өтті. Спорттық ойындарға әбден машықтанған теміржолшылар футбол, үстел теннисі, волейбол ойындарынан бақ сынады. Турнирдің жалпыкомандалық есебі бойынша қола медаль ШЧ-3 командасына бұйырса, күміс медальді Шалқар локомотив жөндеу депосы еншіледі. Ал бас жүлдені Ақтөбе филиалы командаларынан құралған Әскерилендірілген теміржол күзет бөлімі қанжығалады.
«ӘТЖК» ЖШС Ақтөбе филиалы мен Шалқар бөлімшесінің басшылары мұндай кездесулердің ұжым үшін ұтымды тұстары көп екенін айтты.
«Теміржол қызметкерлері арасындағы дүбірлі додалар әр жұмысшының денсаулықтарына өте пайдалы. Жұмыс пен спортты қатар ала жүргендеріңіз қуантады. Күзет мықты болса, қауіп жоқ», – деді «ӘТЖК» ЖШС Ақтөбе филиалының басшысы Сарыбай Сәрсенов.
Оқ бойы озық көрінген жеңімпаздар мен ұжым белсенділеріне мақтау қағаздары, медальдар мен кубок табысталды. Кіші футбол, волейбол, үстел теннисі жарыстарында әр ойыншыға бағалы сыйлықтар мен ас үй техникалары сыйға тартылды.
Сонымен қатар жарыс жүлдегерлері мен жеңімпаз командаға марқұмның отбасы ақшалай сыйлық табыстады. Бірінші орын алған командаға 100 мың теңге, екінші орын алған командаға 70 мың теңге, үшінші орын алған командаға 50 мың теңге табысталды.
