Шетпелік теміржолшылар арасында шағын футболдан сайыс өтті
Маңғыстау облысы бойынша меншікті тілші
Өткен апта маңғыстаулық теміржолшылардың жеңіске толы табысты аптасы болды. Спорттық ойындарда бағы мен бабы үйлескендер жеңіс тұғырынан көрінді.
Шетпелік сала қызметкерлері шағын футболдан бірінші орыннан көрінсе, Өзен станциясында еңбек ететін теміржолшылар садақ атудан алдына жан салмады. Шетпелік футболшы теміржолшылар Маңғыстау ауданының Құрметті азаматы, газ саласының еңбек ардагері Бостанғали Серікбаевқа арнап «ҚазТрансГазАймақ» ұйымдастырған мекемеаралық шағын футбол додасында бақ сынады. Командаға станция ұжымында және вагон депосы, жол дистанциясы мен «Теміржолсу» мекемесінде жұмыс істейтін кіл мықты жігіттер жиналды. Қазақстан теміржолының, соның ішінде Маңғыстау теміржолының намысы үшін сынға түскен олар қарсыластарынан ойсырата жеңіп, бас жүлде 100 мың теңгені қанжығаларына байлады. Осы топтың қақпасын мықтап күзетіп, доп кіргізбеуге барын салған бір ойыншысы «Үздік қақпашы» номинациясымен марапатталды.
– Теміржолшыларымыздың спорттағы жағымды жаңалықтары бізді қатты қуантты. Шетпеліктер шағын футболдан қарсыластарын артта қалдырды. Өзен станциясы бастығының орынбасары Самал Зулпыхаров Маңғыстау облысы мешіт жамағаттары арасындағы дәстүрлі садақ атудан ашық турнирде бірінші орынды иемденді. Жалпы, жігіттеріміз жарады. Олар сала қызметкерлерінің қашан да шымыр және мықты болатынын тағы дәлелдеді, – дейді Маңғыстау теміржолшыларының спорт нұсқаушысы Нұрайна Қыдырова.
