Теміржолшы атында турнир өтті
Қызылорда облысы бойынша меншікті тілші
Шиелі станциясындағы салалық мекемелерде еселі еңбек ете жүріп жастарды салауатты өмір салтын ұстануға, патриоттық тұрғыдан тәрбиелеуге сүбелі үлес қосқан Серік Шәймерденовті сыныптастары, шәкірттері мен әріптестері еске алып, баскетбол турнирін өткізді.
Серік Шәймерденов 1965 жылы Шиелі кентінде дүниеге келген. Мектеп табалдырығында жүріп өзінің спортқа жақын, оның ішінде баскетболға жаны құмар болған. Орта мектепті бітіргеннен кейін Ленинградта оқып тәлім алған ол, 1982 жылдары теміржолдың күзет қызметінде жұмыс жасап, 1998-2003 жылдары аудандық мектепте дене шынықтыру пәнінен ұстаз болып қызмет атқарған екен. 2004 жылдан бастап Шиелі өрт сөндіру пойызында өрт сөндіруші болып жұмыс жасаған. Ол қай мекемеде жұмыс жасаса да спорттан қол үзбей, шәкірттерінің жанынан табылыпты. Серік аудандық баскетбол құрама командасының құрамында жүріп талай мәрте аудандық, облыстық шеңбердегі біріншіліктердің жүлдегері атанған. 1986 жылғы «Алтын күз» спартакиадасының жеңімпазы, 2008 жылы Байқоңыр қаласында ардагерлер арасында өткізілген жарыстың жеңімпазы болған екен. 2020 жылы дүниеден өткен. Артында ұл мен қызы қалыпты.
– Серік біздің Шиелі өрт сөндіру пойызында жұмыс жасаған әріптесіміз. Осы турнирді ұйымдастырушылар Серіктің сыныптасы Бақытқа, шәкірттері Самат пен Дулатқа алғыс айтамын. Біздің ұжымның атынан жүлдегерлерге медаль мен кубок, естелік сыйлық берілді. Және де Серіктің сыныптас досы «Көпфункционалды қызмет көрсету орталығы» филиалы МЕ өртке қарсы қызметі тобының бастығы Бақытжан Ділімбетовтің атынан әзірленген адресатты табыстадым, – деді Шиелі өрт сөндіру пойызының бастығы Арнауыт Садық.
