Атырау жүк тасымалында үстел теннисінен сайыс өтті
Атырау облысы бойынша меншікті тілші
Үстел теннисі – елімізде, соның ішінде теміржолшылар арасында өте кең тараған ойындардың бірі. Жуырда Атырау жүк тасымалы бөлімшесі Кәсіподақ ОК Атырау өкілдігінің ұйымдастыруымен жұмысшылар арасында үстел теннисінен ерлер және әйелдер арасында жарыс өтіп, оған өңірдегі теміржол мекемелерінен 20 адам қатысты.
Ойын түрі қозғалыс белсенділігімен ерекшелене отырып адамның бойына жылдамдық, ептілік, зейінді арттыру, әрекет жасау, көзбен мөлшерлеу, ойлау сияқты қабілеттерін қалыптастырады. Соған сай теміржолшылар ойын барысында ракеткамен теннис шаригін қақпақылдап қарсыласына дес бермеуге тырысты, шабуыл шапшаңдығын үдетіп, допты қатты соққымен бағыттап отырды.
Тартысты өткен ойын нәтижесінде ерлер арасында жүлделі бірінші орынды машинист-нұсқаушы Д.Сүлейменов иеленді. 2-орын машинист А.Тюмешов, ал 3-орын вагон қараушы М.Қаражігітовтің қанжығасына байланды. Ал әйелдер арасында 1-орынды ШЧ-8 электромеханигі Е.Жұмалиева жеңіп алды. Жеңімпаздарға диплом мен бағалы сыйлық табыс етілді. Аймақтық жарыста орын алған жеңімпаздар енді үстел теннисінен Алматы қаласында өтетін жарысқа Атырау өңірінің құрама командасы ретінде қатысады.
