Локомотившілер – чемпион!
Абай облысы бойынша меншікті тілші
Семей жүк тасымалы бөлімшесінде алда келе жатқан Тәуелсіздік мерекесіне орай спорттық спартакиада басталды. Салалық кәсіподақ ұйымының ұйытқы болуымен сайыстың беташарында жергілікті теміржолшылар шағын футболдан шеберлік сынасты.
Бұл жолғы сайысқа желі бойынан жиналған жалпы саны 10 команда қатысып, өзара бақ сынасты. Финалға дейінгі іріктеу кезеңінде барлық командалар топтық сайыс өткізді. Осылайша, ақтық сында өнер көрсететін командалар анықталып, шешуші кезеңге төрт команда жолдама алды. Олар осыған дейін де кезегімен бөлімше чемпионы атанып келген кіл мықтылар болатын.
Ал түс ауа жарыс көрігі тіптен қызып, зал іші қызуқанды жанкүйерлердің қиқуына толы болды. Ақтық бәсекеге, соңғы финалға білек сыбанып шыққан қос команда – ТЧЭ-24 пен ПЧ-39 командаларының ойыны мейлінше тартысты өрбіді. Кілең әуесқой футболшылар жиналғандықтан да мықтыны анықтау оңайға түскен жоқ.
Әйтсе де, ойын қорытындысы 4:2 есебімен жабылып, локомотившілер жеңіске жетті. Жолшылар командасы екінші орын алса, үшінші орынды Жаңа-Семей станциясының футболшылары қанағат тұтты.
Айта кетсек, ТЧЭ-24 командасы – 2010 жылдан бері бөлімшеішілік, қалалық және ұлттық компания бойынша өткізілген көптеген жарыстарда топ жарып, бас бәйгені бермей чемпион атанып жүрген команда. Бұл жолы да асықтары алшысынан түсті.
Барлық жеңімпаз командалар қаржылай сыйлық сертификаттар мен Құрмет грамоталарын иеленді. Ойын соңында естелік фотосуретке түсті.
