Шаршы алаңда – ардагерлер
«Қазақстан теміржолшысы» газетінің тілшісі
Жұма күні «ҚТЖ» ҰК» АҚ Теміржолшы-ардагерлер орталық кеңесінің 10 жылдық мерейтойына орай дойбы, шахмат, дартс, үстел теннисі сияқты спорт түрлерінен жарыс өтті.
Жиырмаға жуық ардагер-теміржолшы қатысқан жарыс айтарлықтай қызықты өтті. Дартс – зейнеткерлердің мергендіктерін сынға салды, тирге дәл тигізіп, көп ұпай жинап, балаша қуанған жандармен бірге қуанысып, жебесі мүлт кеткендермен қоса мұңайдық. Үстел теннисінде әйелдер жағы бақ сынаудан тартынса, ерлер жағы бабында екендерін танытты. Есесіне, апаларымыз дойбыдан дес бермеді. Ақсүйектер ойыны шахматта ер азаматтардың бағы жанды.
Қысқасы, екі сағатқа созылған жарысқа қатысқан да, қатыспаған да, жүлде алған да, алмаған да риза болды. Дартс ойыны бойынша әйелдер арасынан Мәриям Көмекова 1-орын (дойбыда 2-орын), Мукарама Картикенова 2-орын (дойбыда 1-орын), Раушан Абишева бұл жарыста да, дойбыда да 3-орын алды. Ерлер арасында Мұхит Контуренов жеңімпаз деп танылып, Қамидолла Айтимов пен Акрам Дигенбаев 2-ші және 3-ші орынды өзара бөлісті. Үстел теннисі жарысында Акрам Дигенбаев 1-орын алып, Қамидолла Айтимов 2-орынды еншіледі, ал Сейсембай Шермаханов ағамыз 3-орынды қанағат тұтты. Шахматқа екі ардагердің тісі батып, бұл ойында Амандық Алдаберген жеңімпаз деп танылса, екінші орын автоматты түрде Нұржан Жақсыбаевқа бұйырды. Жарысқа қатысып, жүлдегер атанған теміржолшы ардагерлерге дипломдармен қатар бағалы сыйлықтар табыс етілді.