Қызылордада Тәуелсіздік күніне орай спорттық сайыстар өтті
Қызылорда облысы бойынша меншікті тілші
«ҚТЖ-Жүк тасымалы» серіктестігінің Қызылорда филиалында Тәуелсіздік күніне орай стол теннисі, қол күресі, кір тасын көтеру секілді спорттық сайыстардан жарыс ұйымдастырды.
«Аманат» партиясы БП ұйымының демеушілігімен ұйымдастырылған жарыста филиал бастығының орынбасары Мейрамбек Шолтабаев құттықтау сөз сөйлеп, жарысқа қатысушыларға сәттілік тіледі. Спорт нұсқаушысы Бақытжан Имбергенов жарыс шарттарын түсіндіріп, қауіпсіздік талаптарының қатаң сақталуын еске салды.
Стол теннисі – бүгінде қызылордалық теміржолшылар жақсы меңгерген сүйікті ойын түріне айналған. Бұл сайыста экономикалық бөлімнің мамандары Гүлмира Дүйсенова мен Гүлнәр Шайманова ерекше шеберліктерін танытты. Ерлер тобы бойынша ойын Мақсат Әбжаппаров, Талғат Сыздықов, Әмірбек Матжанов, Дархан Биманов, Бейбіт Абдуллаев және Дархан Айқожаев арасында жалғасты. Кір тасын көтерушілер мен қол күресі сайысы білекті де жүректі жігіттерді танытып, сайыс қорытындысында барлық қатысушылар жүлдегер саналып, партия филиалы тарапынан дайындалған естелік сыйлықтармен марапатталды.