Семейде «Жаңажылдық жүлде» турнирі өтті
Абай облысы бойынша меншікті тілші
Семейде «Жаңажылдық жүлде» атты ерекше турнир өтіп, теміржолшылар жылдың спорттық іс-шараларын үстел теннисімен қорытындылады.
Біріншілік барысында алдын ала іріктелген 19 теміржолшы шеберлік сынасты. Сайыс топтық айналым бойынша өткізілді. Сәйкесінше, барлық қатысушылар көсіліп ойнап, өнерлерін көрсете білді. Олардың арасында бөлімшенің, тіпті қала мен облыстың бірнеше мәрте чемпионы атанған жандар да болды. Атап айтсақ, әйелдер арасындағы сайыста ерекше өнер көрсетіп, бірінші орынды «Қазтеміртранс» АҚ Семей филиалының қызметкері Айгерім Тоқпанова жеңіп алды. Екінші орынды Семей станциясынан Салтанат Закарьянова иеленсе, жүлделі үшінші орынды ШЧ-29 мекемесінен Гүлнар Ибраева алды.
Сол тәрізді ардагер-ерлер арасында Жұмағали Жақыпжанов топ жарса, екінші орын ТЧЭ-24 мекемесінен келген Берікжан Қоңқашевке бұйырды. Жалпы, ерлер арасындағы сайыс мейлінше тартысты өтті. Оның нәтижесінде бірінші орынды үстел теннисінен республика чемпионы, «ҚТЖ» ҰК» АҚ-ның құрама командасының белді мүшесі ШЧ-29 мекемесінен келген Рустам Мұхаметжанов жеңіп алды. Екінші орынға НЖС-6-дан Асқар Есенаманов лайық деп танылды.