Үш бірдей жүлдеге ие болды
"Қазақстан теміржолшысы" газетінің Жамбыл облысындағы меншікті тілшісі
Мамыр айындағы күнтізбелік жоспарға сәйкес теміржолшылар кәсіподағының Жамбыл филиалы спорт нұсқаушыларының ұйымдастыруымен армрестлинг, дойбы және үстел теннисінен спорттық жарыстар өтті.
Қазақстан темір жолының 120 жылдығына арналып өткізілген спорттық бәсеке қызықты өтті және тосын сыйларға толы болды. Ерлер арасында армрестлингтен жүлделі орындарды «ЖРС» ЖШС слесарі Пірімбек Ғалым, ВП-35 тракторшысы Сәрсембай Асылбек және ПЧ-51 жол дистанциясының жол монтері Әнуар Бейсенбаев иеленді. Ал әйелдер арасында өткен сайыста үш жүлделі орынды да ШЧ-36 белгі беру және байланыс дистанциясының нәзікжандылары жеңіп алып, айды аспанға бір-ақ шығарды. Жүлделерді өзара бөліскен Сағат Жүнісбекова, Мадина Шарипова және Ақбота Ембергенова білекті де жүректі арулар деп дәріптелді. Сондай-ақ дойбыдан өткен жарыста да үш бірдей жүлделі орын ВП-35 қалпына келтіру пойызының қызметкерлері Махат Байдалиев, Мейіржан Аярбеков және Нұрлан Сахановқа бұйырды.
Үстел теннисінен өткен турнирде ПЧ-52 жол дистанциясының кезекшісі Сәрсебек Қуаныш, Талас станциясының пойыз құрастырушысы Алмаз Бопбеков және Тараз көліктік оқу орталығы филиалы – Теміржол көлігі персоналын бағалау және дамыту орталығының оқытушысы Талғат Төлебековтің жолы болып, жеңіс тұғырынан көрінді.
Жеңімпаздар мен жүлдегерлер арнайы грамоталармен, медальдармен, бағалы сыйлықтармен марапатталды.
