Сұрмерген cтанция бастығы
Маңғыстау облысы бойынша меншікті тілші
Қазақстан темір жолы мен Маңғыстау темір жолының мерейтойларына арналған спорттық сайыстар жалғасын табуда. Жуырда Болашақ станциясында шағын футболдан турнир ұйымдастырылды.
Түркіменстанмен шекаралас станцияда өткен спорттық шараның ашылу салтанатына Болашақ ауылының әкімі, шекара заставасының командирі, станция бастығы қатысып, командаларға сәттілік тіледі. Жарысқа Болашақ станциясындағы теміржол мекемелерінен құралған 6 команда және шекарашылар командасы қатысты. Сайыс қызықты өтіп, жанкүйерлерге көтеріңкі көңіл-күй сыйлады. I орынға Маңғыстау белгі беру және байланыс дистанциясының командасы ие болса, II орын Болашақ станциясы ұжымына, III орын шекара заставасының жігіттеріне бұйырды. Жеңімпаз командалармен қоса сайыстың үздік ойыншылары да марапатталды.
– Ерекше тартымды ойын болды. Есте қалар тұстары да көп болды. Мысалы Болашақ станциясының бастығы Мақсат Нұрбековтің ойынға қатысып қана қоймай қатарынан бірнеше гол салып, «Сұрмерген» номинациясын жеңіп алуы нағыз сенсация болды. Басшылық қызметтегі азаматтарымыздың жоғары белсенділігі өзгелерге үлгі болуы керек, – дейді Маңғыстау аймағы бойынша спорт нұсқаушысы Нұрайна Қыдырова.
Жарыстың «Үздік шабуылшы» аталымын белгі беру және байланыс саласының маманы Саламат Жанғозиев, «Үздік футболшы» номинациясын теміржол күзетінен Арсен Аяған, «Үздік қақпашы» марапатын белгі беру және байланыс дистанциясынан Рахмет Башбалаев алды. Шекара заставасының қызметкері Әли Розиев «Үздік қорғаушы» атанды.