Балалар арасында футболдан турнир өтті (Фото)
«Қазақстан теміржолшысы» газетінің тілшісі
Халықаралық балалар мерекесіне орай ҚТЖ-да балалар арасында шағын футболдан турнир ұйымдастырылды. Биыл үшінші жыл өткізілген турнирге 7 команда қатысты.
Әр командада 10-12 жас аралығындағы 8 баладан, өз атаулары бар, компания тарапынан бір-бірін қайталамайтын спорттық киім киіп, алаңға шыққан балалар футболы ерекше тартысты өтті. Өзара оншақты ойын өткізіп, ақтық финалға шығуға, жүлделі орын алуға барын салған жас футболшылар – ҚТЖ-ның түрлі мекемелерінде, еншілес ұйымдарында еңбек ететін теміржолшылардың балалары. Турнирдің ашылуына қатысқан ҚТЖ Әлеуметтік саясат департаментінің бас менеджері Ақмарал Байғабылова балалардың ойынына сәттілік тілеп, олардың спортты серік етуі – ата-аналарынан алған үлгі-өнегесі екенін жеткізді.
Жарыс соңында үздік командалар жүлделі орындармен және өзінің озық машығын көрсеткен балалар «Үздік ойыншы», «Үздік қақпашы», «Үздік шабуылдаушы» сияқты аталымдар бойынша марапатталды.
Нәтижесінде бірінші орынды «Локомотив», екінші орынды «Тұлпар», үшінші жүлдені «Астана» және төртінші орынды «Метеор» командалары еншілеп, олар арнайы дипломдарға және «Қазкөліккәсіп» ҚБ демеушілігімен бағалы сыйлықтарға және тәттілерге ие болды.
– Әкем – «Вагонсервис» мекемесінде бөлім бастығы болып жұмыс істейді. Жасым 11-де. Астанадағы №45 мектепте 5-сыныпты бітірдім. Әкем спортпен айналысқанды ұнатады, мені де спортқа баулиды. Өзіме футбол ойнаған өте ұнайды. Бүгін турнирге қатысып, көптеген достар таптым, бәрі де әкемнің әріптестерінің балалары, - дейді «Астана» командасының жас футболшысы Абай Қалиакпар.
