Машинистер құрамасы топ жарды
Қызылорда облысы бойынша меншікті тілші
Аймақ теміржолшыларының Қазақстан теміржолының 120 жылдық мерейтойына арналған көпшілік-мәдени шаралары Қызылорда станциясында жалғасты. Салалық мекемелер арасында шағын футболдан жарыс өтті.
«Қазкөліккәсіп» ҚБ филиалы төрағасы Бауыржан Ахметов, Қызылорда-ЖТ кәсіподақ ұйымының төрағасы Мұқтар Көпірбаев ойынның тосын оқиғасыз, қауіпсіз өтуін ұйымдастырумен айналысып, командаларға жарыс жолында жеңіс тіледі.
Бөлімшенің спорт тәлімгерлері Бақытжан Имбергенов пен Фатима Медеуова сайыстың технологиялық талап шарттарына сай өтуін қадағалады. Нәтижесінде Қызылорда белгі беру және байланыс дистанциясының «ШЧ-39» құрамасы жүлделі 3-орын, Қызылорда жол дистанциясының «ПЧ-57» құрамасы 2-орынды иеленсе, аймақтық жарыстарда көштің басын бермейтін Қызылорда локомотив пайдалану депосының «ТЧЭ-34» командасы 1-орын алып, жарыс жеңімпазы атанды.
Жарыс жеңмпаздарына кәсіподақ ұйымдары тарапынан әзірленген естелік сыйлықтар мен кубок, диплом табыс етілді.