Тараз станциясында футболдан іріктеу турнирі өтті
"Қазақстан теміржолшысы" газетінің Жамбыл облысындағы меншікті тілшісі
Қазақстан темір жолының 120 жылдығына орай Тараз станциясында теміржолшылар арасында ІІ спартакиадаға шағын футболдан іріктеу турнирі өтті.
Аралас жүйе бойынша ұйымдастырылған Жамбыл жол бөлімшесі футзалдағы іріктеу матчтарында спартакиадаға жолдама сарапқа салынды. Жоғары дайындықпен келген командалар алдымен топта ұпай саны бойынша алға шыққандарды анықтады. Топтағы үздіктер айналмалы жүйенің талабына сай өзара кездесіп, финалистер іріктелді.
Шағын футбол – нағыз бұқаралық сипат алған спорт түрі. Жамбыл жол бөлімшесі кәсіподақ ұйымы төрағасының орынбасары Серік Наурызбаевтың айтуынша, теміржолшылар өзара жолдастық кездесу өткізіп, футзалға жиі бас сұғып тұрады екен. Сондықтан командалар бір-бірінің ойын өрнегімен жақсы таныс.
Кездесулерде карсылас командадағы шабуылшылардың тактикасын жақсы білетін қорғаушылар барын салды. Қорғаныс шебін жақсы ұстағандықтан, қарсыластар бір-бірінің қақпасына саңылау таба алмады.
Тартысты өткен жарыс қорытындысы бойынша екі команда ІІ спартакиадаға жолдама ұтып алды. Олар – «ТЧЭ-31» Сарышаған локомотив пайдалану депосының және «ВЧД-27» Жамбыл вагон пайдалану депосының футболшылары.