Шетпе станциясында теміржол мекемелері арасында шағын футболдан турнир өтті

Қазақстан темір жолының 120 жылдығы мен Маңғыстау темір жолының 50 жылдығын атап өтуге арналған жоспар аясында Шетпе станциясында теміржол мекемелері арасында шағын футболдан турнир ұйымдастырылды.

Шоқыр Бөлтекұлы атындағы спорт кешенінде өткен дүбірлі додада жеті команда бас сынасты. Түбек теміржолының спорт нұсқаушысы Нұрайна Қыдырованың айтуынша шалғайдағы бекет, станцияларда спорттық жарыстар жиі ұйымдастырылуда. Бұған дейін Маңғыстау,  Болашақ, Өзен  станцияларында өткізілсе, бүгін Шетпеде, сосын Бейнеуде жалғасады.  Айтуынша, бұл сайыстарда сондай-ақ шалғай станциялардағы жақсы ойыншылар Маңғыстау құрамасының сапына іріктеледі. Үлкен жарыстарға команда жасақталады. Алдағы басты бәсеке қазан айында Шымкент қаласында өтетін чемпионат. Маңғыстаулықтар қазірден соған дайындықты бастап, екі жыл бұрын қарағандылықтарға жіберіп алған есесін қайтаруды көздеп отыр.  

Жасыл алаңда жеті команда да осал ойнамады, дегенмен бас жүлде бір командаға бұйырып, станциялықтар бірінші орынды иеленді. Екінші орынды жол дистанциясының жігіттері еншіледі. Ал үшінші орын станция ұжымының еншісіне тиді. «ПЧ» командасынан жол монтері Бағлан Мырзабаев «Сұрмерген» атанса,  станция кезекшілері Нұрбек Базарджанов «Үздік футболшы 2024»,  Достанбек Аманқосұлы «Үздік қақпашы» номинацияларына ие болды. ТЖС бөлім бастығы Бауыржан Батабаев  «Үздік қорғаушысы», ал станцияда операторы Береке Бекмұрзаев «Үздік шабуылшы» марапатын алды.

– Қазір естуімізше, жігіттеріміз қолы босаған сәтте осы сайыстарға дайындық мақсатында көп уақытын спорт залда өткізетін болған. Бұл үшін кәсіподақтың қолдауымен мүмкіндіктер қарастырылған. Жерілікті спорт залдарды жалдап, тренажерлік құрылғыларды алып бергенбіз. Қазір Маңғыстау, Өзен, Болашақ, Шетпедегі теміржолшылар осы мүмкіндіктерді пайдалануда, – деді спорт нұсқаушысы.