Чемпионға құрмет көрсетілді
Маңғыстау облысы бойынша меншікті тілші
Жақында Үндістанда өткен Араши ММА жарысында қарсыластарын жеңіп, Азия чемпионы атанған түбек теміржолшысы Әлихан Аббасты Маңғыстау теміржолы мен кәсіподағының басшылығы қабылдап, жеңісімен құттықтады.
Маңғыстаулық теміржолшылардың мақтанышына айналған чемпионға сый-құрмет көрсетіліп, алғыс айтылды. Жүк тасымалы Маңғыстау қосалқы бөлімінің бастығы Нәжімеден Ғұбашов пен Сала кәсіподағынынң өкілі Сәрсенбай Есенқұлов және басқалар ақжарма лебізі мен тілектерін білдірді.
– Маңғыстау - таланттар мекені. Біздің теміржолшылар арасында сегіз қырлы бір сырлы жігіттер де, түрлі өнерімен тәнті етер қыздар да көп. Әлихан батырымыз да міне, өзін өзге елдерге мойындатып, шетелде еліміздің беделін артырып отыр. Біз мұндай теміржолшыларымызбен мақтанамыз. Бұл жеңіс – Маңғыстау теміржолы мен Қазақстан теміржолының мерейтойларына тамаша тарту болды. Сан қырлы таланттарды тоғыстырған түбек теміржолының мерейін арттырар осындай жігіт-қыздарымыз аман болсын, олардың жеңісі біздің жеңісіміз, – деген Нәжімеден Ғұбашов өңір теміржолшылары атынан чемпионға естелік сыйлық пен қаржылай марапат және алғыс хат табыстады.
Әлихан Аббас әріптестеріне алғысын білдіріп, әрқашан өзіне артылған сенімді ақтауға уәде берді.
