Семейлік теміржолшылар халықаралық додаға қатысты

Бүгінде семейлік теміржолшылар арасында кеңінен тарап келе жатқан бірегей спорт түрі – экстремалды атлетика. Кәсіби тұрғыда жаттыққан спортшылардың жүрегі дауалай бермейтін осынау ерекше спорттан өткен халықаралық сайыста теміржолшылар жүлделі орыннан көрінді.

Бұл жолғы сайыс түркі жұртының атамекені Өр Алтайдың төрінде, Қатон-Қарағай жерінде өтті. Әйгілі Берел ауылының маңындағы соқпақты шатқалда өткен сайысқа қатысқан әуесқой спортшылар әртүрлі қашықтықта, атап айтсақ 3, 5 және 26 шақырымды жүгіріп өтулері тиіс болатын. Жарыс жолы оңай емес, тау-тасты кезіп, борпылдақ топырақ пен бұталы жерді кесіп өтеді. Ғажайып табиғаты тамсандыратыны болмаса, қауіп пен қатер де аяқ астында. Оның үстіне жарыста жүгірушілер 500 метрден асатын тау қиясын өрлей жүгіруі тиіс.  

Ал Алтайдың ұшар басынан құлаған жақпар тастардан секіріп өтуге тура келеді екен. Осылайша асқар таулар аясындағы әсем сарқырамалардың жанынан өтіп, қалың қарағайдың арасымен мәреге жетулері тиіс. Десек те, «QATON-QARAGAI TRAIL RUNNING RACES 2024» байқауына білек сайланып келген теміржолшы қыздар мен жігіттер аянып қалған жоқ. Мәселен, Семей станциясында еңбек еткен сала зейнеткері Дәмегүл Бөлекпаева 5 шақырымдық қашықтыққа жүгіруден жүлделі екінші орынды жеңіп алып, жеңіс тұғырынан көрінді. Ал сан түрлі сайыстарда топ жарып жүрген НЖС6 техникалық бөлімінің бастығы Нұрлан Бегәділов 26 шақырым қашықтыққа жүгіріп, өз салмағы бойынша жүлделі үшінші орынды қанжығасына байлады. Еліміз бен алыс-жақын шет елдерден жиналған 60-тан аса тәжірибелі спортшылар қатысқан жарыста мұндай нәтиже көрсету оңайға соқпағаны анық.

– Халықаралық деңгейдегі байрақты бәсекеге қатысудағы басты мақсатымыз – теміржолшылар қауымының да тұмса табиғатпен етене өмір сүріп, аймақтың географиялық ерекшеліктерін, флорасы мен фаунасын танып-білуге құмар екендіктерін паш ету. Ал осынау жеңісімізді Қазақстан теміржолының 120 жылдық торқалы тойына арнадық, – дейді жеңімпаздар мақтаныш сезіммен.