Білекті де жүректі жігіттер
Атырау облысы бойынша меншікті тілші
Атырау локомотив пайдалану депосының ауласында биыл ашылған спорт алаңында Қазақстан темір жолының 120 жылдығына орай спорттың бірнеше түрінен жарыс өткізілді.
Аймақ темір жолында еңбек етіп жатқан құрылымдық мекемелер қатысқан сайыс ұлттық спорт түрі – арқан тартудан басталды. Бұл өзі жанкүйерлердің делебесін қоздырып, еріксіз елтіп әкететін талапай тартыс екені даусыз. Көбіне «әуп» деп алдымен күш алып кеткені арқанды өз жағына тартып кетеді. Білекті жігіттер сайысында 3-ші орынды «Қазтеміртранс» АҚ филиалы, 2-ші орынды ЭЧ-4, ал 1-ші орынды ТЧЭ-3 локомотившілер командасы жеңіп алды.
Кір тасын көтеруден 1-орынды Атырау электрмен жабдықтау дистанциясының аға электромеханигі Н.Нұрбаев 16 кг кір тасын 100 рет көтеріп алға озса, дартстан – нысанаға шаншудан бөлімшенің АСУ инженері А.Қабиев мергендік танытты. Әйелдер арасында қолкүрестен (армрестлинг) Теңдік станциясының инженері Ә.Сатыбаева, ерлер арасында машинист көмекшісі Г.Қоянбай, ал 80 кг жоғары салмақта ТЧЭ-3 машинист көмекшісі А.Асқарбақыт иеленді. Әртүрлі ұжымнан жанкүйерлер мол жиналған жарыс соңында жеңімпаздарға арнайы дипломдар және ақшалай сыйлық табыс етілді.