Арыста футболдан іріктеу турнирі өтті
Түркістан облысы бойынша меншікті тілші
Арыс қаласындағы орталық стадионда теміржолшылардан құралған 5 футбол командасы бас қосып, іріктеу турнирін өткізді.
Қазақстан темір жолының 120 жылдығына «Қазкөліккәсіп» ҚБ Шымкент магистральдық желісінің кәсіподақ ұйымы өткізген шараға саламатты өмір салтын ұстануды серт еткен 60-қа жуық теміржолшы қатысты.
Салалық мекемелердің атынан шығып, өз ұжымдастарының намысын қорғаған командалық сайыста қарсыластар жеребе арқылы анықталды. Ал теміржолшы-спортшылар ойынды үш айналым бойынша кезектесіп жүргізді. Нәтижесінде, Арыс белгі беру және байланыс дистанциясының (ШЧ-38) жігіттері үздік шығып, іріктеу турнирінің жеңімпазы атанды. Ал екінші орын «ТЧЭ-32» – Арыс локомотив пайдалану депосының командасына бұйырды. Арыс станциясының жігіттерінен құралған команда орынға лайық деп танылды.
Спорттық шараға қатысушылардың барлығына естелік кәдесыйлар беріліп, жеңімпаздар командаларға арнайы грамоталар мен медальдар табыс етілді. Ал үздік атанған командаға кубок табыс етілді.
