Күзет қырандары тағы жеңімпаз атанды
Абай облысы бойынша меншікті тілші
Жуырда Семей қаласында теміржол мекемелері арасында дәстүрлі түрде өткізілетін «КАЗПРОФТРАНС-2024» теміржол футбол лигасының Кубогі» аймақаралық біріншілігі өтті.
Қалыптасқан үрдіске сай жарысқа көршілес бөлімшелерден, Алматы, Павлодар, Өскемен қаласынан арнайы келген футбол командалары қатысты. Жеңімпаз команда республикалық сайысқа баратындықтан бұл жарысқа жоғары даярлықтан өткен, іріктелген ойыншылар ғана жиналады.
Турнир беташарында сөз алған «ҚАЗКӨЛІККӘСІП» ҚБ Семей аймағы бойынша өкілі Есен Қажығұлов бұқаралық спорттың маңыздылығын атап өтіп, барша қатысушыларға жеңіс тіледі. Жыл сайын күзгі мезгілде ұйымдастырылатын осынау байрақты бәсеке салалық кәсіподақ ұйымының ұйытқы болуымен өткізіліп келеді.
Төрт команда бақ сынасқан ойын барысы мейлінше тартысты өрбіді. Әсіресе, павлодарлық команданың қарымы мықты екен. Жасыл алаңда барын салды. Бұл жолғы аймақаралық турнирге Семейден бөлімше чемпионы атанған ӘТЖК Семей филиалы қатысқан болатын. Осыған дейін негізінен ауыр атлетика түрлерінен топ жарып жүрген жігіттердің жеңісі көпшілікті таңырқатқан еді. Десек те, бәсеке барысында күзет қырандарының жолы болып,тағы бірінші орынды жеңіп алып, айды аспанға шығарды. Екінші орынды Павлодар қаласынан келген Қазақстан вагон шығару компаниясының командасы, үшінші орынды Өскемен-1 станциясының футболшылары иеленді.
Сайысқа қатысқан барлық ойыншылар арнайы диплом және сыйлықтармен марапатталды. Ал аймақаралық турнир жеңімпазы атанған ӘТЖК Семей филиалының командасы енді Орал қаласында өтетін сайыста өнер көрсететін болады.