Қызылордада үстел теннисінен сайыс өтті
Қызылорда облысы бойынша меншікті тілші
Қазақстан теміржолының 120 жылдық мерейтойына орай қызылордалық теміржолшылар арасында мәдени-көпшілік шаралар жалғасуда. Өткен аптада болған теннис жарысына аймақтың барлық станцияларынан ойыншылар қатысты.
Сайысты өткізуге бастамашы әрі демеуші болған «Қазкөліккәсіп» ҚБ Қызылорда филиалының төрағасы Бауыржан Ахметов жетекшілік еткен кәсіподақ өкілдері ойыншыларға сәттілік тіледі. Спорт секторы қатысушыларды Бақытжан Имбергенов ойын тәртібі мен ережелерімен таныстырған соң сайыс басталып кетті. Әлем бойынша кең тараған ойын болғанмен аймақ теміржолшылары арасында енді-енді басымдық ала бастаған үстел теннисінің ракеткасына қол үйреткендер қатары баршылық екен. Шеңберлі жүйемен басталған ойын ережесіне сәйкес барлық қарсыластар бірімен-бірі кезекпен ойын үстелінде кездесіп, жеңіске жеткен теннисші келесі қарсыласымен бақ сынасуға жіберілді.
– Бүгінгі ойын нәтижесінде Қазалы жол дистанциясынан додаға қатысқан Қайрат Денеевке жетер шебер ойыншы болмағанын көздеріңіз көрді. Жүлделі 1-орынды иеленді. Ал 2-орын алған Қызылорда ЖТ бөлімшесінің инженері Талғат Сыздықов та жаман нәтиже көрсеткен жоқ. 3-орынды Қызылорда электрмен жабдықтау дистанциясының электромеханигі Бахыт Иманалиев алды, – деді ойын қорытындысын баяндаған ұйымдастырушы әрі төреші болған спорт секторы Бақытжан Имбергенов.
Бақ пен бап сайысқа түскен додада ойыншылардың жасына шектеу қойылған жоқ. Жүлдегерлерге кәсіподақ ұйымы атынан кубок, диплом және бағалы сыйлықтар табысталды.
