Локомотившілер жеңімпаз атанды
Абай облысы бойынша меншікті тілші
Семейлік спортсүйер теміржолшылар тартысты додаларға толы қазан айын үстел теннисі сайысымен қорытыдылады. Спорттың осы түрінен Семей ЖТ бөлімшесі бойынша жекелей және командалық біріншілік ұйымдастырылды.
Үстел теннисі жергілікті сала қызметкерлері арасында танымалдылыққа ие. Бұл ойын түрінен теміржолшылар қауымы қалалық спартакиаданың да сан мәрте жеңімпазы атанған болатын. Бұл жолғы турнирге әр тобы үш ер және бір әйел адамнан тұратын командалар қатысып, ерлер 18-35 жас, 36-49 жас және 50 жастан асқан ардагерлер болып өзара үш топқа бөлінді.
Жарыс басталар алдында «Қазкөліккәсіп» ҚБ Семей өңірі бойынша өкілі Есен Қажығұлов сөз алып, салауатты өмір салтын ұстанудағы спорттық шаралардың маңыздылығына тоқталып өтті. Осыдан соң Әнұран шырқалып, жарыс көрігі қызып сала берді.
Сайысқа үстел теннисінен сан мәрте топ жарып, ұлттық компания қызметкерлері арасында да жеңімпаз атанып жүрген әуесқой спортшылар қатысты. Солардың бірі ШЧ-29 ойыншысы Рустам Мұхаметжанов өз жас шамасы бойынша жүзден жүйрік атанды. Сол тәрізді ТЧЭ-24 мекемесінен Асхат Елубаев пен НЖС-6 спортшысы Қайрат Қарақанов та чемпион атағын жеңіп алды.
Ал әйелдер арасында бірінші орынды Семей станциясының әуесқой ойыншысы Салтанат Закарьянова, екінші орынды ШЧ-29 қызметкері Гүлнар Ибраева, жүлделі үшінші орынды Семей жол дистанциясынан Анара Нығметжанова иеленді.
Сонымен қатар командалық ойын нәтижесі де сарапқа түскен болатын. Жалпы командалық есепте бірінші орынға ТЧЭ-24 теннисшілері тұрақтаса, екінші орынды НЖС-6 командасы алды. Үшінші орын ШЧ-29 теннисшілеріне бұйырды. Жарыс соңында жеңімпаздар мен жүлдегер командалар арнайы дипломдармен, грамоталармен және кәсіподақ ұйымы тарапынан әзірленген бағалы сыйлықтармен марапатталды.
