Қызылорда станциясында асық атудан сайыс өтті
Қызылорда облысы бойынша меншікті тілші
«Қазкөліккәсіп» ҚБ Қызылорда филиалының аймақ теміржолшылары арасында арнайы ұйымдастырылған асық ату сайысы Қызылорда станциясында өтті.
Қазақстан теміржолының 120 жылдық мерейтойына орайластырылған бұл жарысқа Қызылорда магистральдық желі бөлімшесінен, Әскерилендірілген теміржол күзеті, Қызылорда локомотив пайдалану депосы, Қызылорда белгі беру және байланыс дистанцияларынан теміржолшылар қатысты.
Кәсіподақ атынан филиал төрағасы Бауыржан Ахметов, спорт секторы Бақытжан Имбергенов сөз сөйлеп, қатысушыларға сәттілік тіледі. Жарыстың бас төрешісі Райхан Наукеев, спорт нұсқаушы Фатима Медеуова жарысқа қатысушыларға ойын шартын түсіндірді. Асық ойынының шарты мәреге тігілген 15 асықты 5 метрлік қашықтықтан сахамен нысаналап, шиырып ату арқылы қазаннан шығарып ұпай жинау екен. Қазандағы нысанаға қойылған асықтар соққы тигенмен, шеңберден шықпай қалғанда, соққы жанамалай тигенде ойыншыға ұпай берілмейді.
– Мал шаруашылығымен ғұмыры тығыз байланысқан қазақ халқында өскелең ұрпағының нысанаға алған затын дәлдікпен олжалауы үшін, ширақ қимыл мен епті әрекетті ұштастыра білуге баулу, көздегенін ұстамдылықпен қанжығалап, алғырлық көрсетуге талпындыратын ойын түрі – асық ату. Ұлтымыздың бұл дәстүрлі ойынын теміржолшылар арасында насихаттауды жөн көрдік, – дейді бөлімшенің спорт нұсқаушысы Бақытжан Имбергенов.
Ойын қазандығындағы асықтарды ептілік пен дәлдікпен нысаналау нәтижесінде ӘТЖК мекемесінің күзетшілері Құлагер Арыстан мен Нұрбол Сағидолланың асығы алшысынан түсіп, жүлделі екі орынды қанжығаларына байлады. Сала бойынша өткізілетін талай сайыста қарсыластарына есе жібермейтін Қызылорда локомотив пайдалану депосының тәжірибелі машинисі Арғынғазы Ысқақов жүлделі 3-орынды иеленді. Жүлдегерлерге «Қазкөліккәсіп» ҚБ Қызылорда филиалының атынан диплом мен бағалы сыйлықтар табыс етілді.
