Жеті бірдей команда жүлдеге таласты
Қызылорда облысы бойынша меншікті тілші
«Қазкөліккәсіп» филиалының ұйымдастыруымен Тәуелсіздік мерекесіне орай қызылордалық теміржолшылар арасында өткен волейбол жарысында жеті бірдей команда жүлдеге таласты. Олар бір-бірімен талай додада бақ сынасқан сыралғы командалар да болды. Командалар «Қазкөліккәсіп» тағайындаған жүлдені иемдену үшін бір-бірінен шеберліктері мен айласын асыруға тырысып барын салды. Осыған дейін үнемі жүлделі орын иеленіп жүрген Қызылорда магистральдық желі бөлімшесінің «НЖС-10» құрамасы бұл жолы да қарсылас шақ келтірмей жеңіс тұғырына көтерілді. Жеңімпаз командаға сәл ғана есе жіберген Қызылорда ЖТ бөлімшесінің «НОДГП-10» құрамасы жүлделі 2-орынды иеленсе, Қызылорда жол дистанциясының «ПЧ-57» құрамасы 3-орынға жайғасты.
– Бұған дейін аймақ теміржолшыларының қатысуымен бұқаралық спорттың әр түрінен аймақтық, бөлімшелік, тораптық дейгейдегі біріншілік, турнирлік жарыстар өткізіліп келді. Бұл ағымдағы жылға есептелген спорттық-мәдени шаралардың жылжабар жарысы болып саналады. Тәуелсіздік мерекесіне орайластырған додада командалар өте белсенді ойын үлгісін көрсетіп, бәрімізді таң қалдырды, – деді спорт секторы Бақытжан Имбергенов.
«Үздік ойыншы» номинациясын Марат Орынбасарұлы, «үздік шабуылдаушы» номинациясын Шыңғыс Батырхан иеленді. Жеңімпаз командалар «Қазкөліккәсіп» ҚБ Қызылорда филиалы мен мекемелердің кәсіподақ ұйымдары тарапынан әзірленген кубок, дипломды және қаржылай марапатты қанжығаларына байлады.
