Қурорттық аймақта қысқы спорттық ойындар өтті
«Қазақстан теміржолшысы» газетінің тілшісі
Үстіміздегі жылдың 20-22 желтоқсан күндері Бурабай курорты баурайында «ҚТЖ» ҰК» АҚ-ның қысқы спорт ойындары өтті. Қар үстіндегі шағын футбол, шаңғы эстафетасы және шаңғы жарысынан республикалық сайыс барлық өңірден 140 теміржолшы-спортшының басын қосты.
Курортты аймақты дүбірге бөлеген жарысқа Ақмола, Қостанай, Павлодар, Қарағанды, Семей, Ақтөбе, Илецк, Орал және Астана қалаларынан кіл мықтылар жиналды. Үш күн бойы қар жамылған таза ауа аясында қызықты да тартысты сайыстар өтіп, жеңімпаздары мен жүлдегерлері анықталды. Шаңғы жарысында 3-ші және 2-ші орындарды Семей және Ақмола өңірінің шаңғышылары өзара бөліссе, 1-ші орын мінберінен Қарағанды командасы табылды. Әйел-ардагерлер арасында шаңғы жарысы бойынша павлодарлық Лариса Басова жеңімпаз атанды, қарағандылық Арайлым Шакенова 2-ші, Илецктен келген Нүрия Матаева 3-ші орынды еншіледі. Ерлер арасында ақмолалық ардагер Талғат Рахымбаев жеңімпаз деп танылса, семейлік Нұрлан Бегәділов пен қарағандылық Николай Куяниченко өзара соңғы екі орынды бөлісіп, жүлдегерлер сапынан табылды. Ал теміржолшы-әйелдер арасында қарағандылық Галина Золотухина шаңғы жарысынан әріптестерін шаң қаптырып, мәреге бірінші болып жетіп, чемпион атанса, астаналық Лилия Бадрдинова мен павлодарлық Томирис Атымжанова 2-ші, 3-ші орындарды иеленді.
Теміржолшы ерлер арасында шаңғы жарысынан ақмолалық Алексей Янковскийдің бағы жанып, бірінші орынды қанжығасына байласа, қарағандылық Мадет Абикен мәрені екінші болып қиып өтті, ал тағы бір ақмолалық шаңғышы Сергей Щербаков 3-ші орынды місе тұтты.
Қар үстінде теңбіл допты шыр айналдырып, талас-тартысқа түскен жарыста Қарағанды командасы жеңімпаз болды. Ақтөбелік команда мен Илецк қаласының футболшылары жүлдегерлер атанды. Шаңғы эстафетасында қарағандылық команда бірінші орын иегері болса, 2-ші орын ақмолалық, ал 3-ші орын семейлік командаға бұйырды. Осылайша, жалпы командалық есепте Қарағанды өңірінің спортшы теміржолшылары топ жарып, жеңімпаз атанды. Ал екінші және үшінші орын Семей және Ақмола спортшыларына бұйырды.