Қарағайлы ормандағы шаңғы жарысы
Абай облысы бойынша меншікті тілші
Семей ЖТ бөлімшесінің теміржолшылары үшін қысқы спорттық ойындар түрлері ашық деп жариялануда. Жергілікті «Локомотив» спорт клубы мен салалық кәсіподақ ұйымының ұйытқы болуымен жоспарлы іс-шаралар қатары ресми түрде басталып кетті.
Шығыстың табиғаты қысқы спорт түрлерін дамыту үшін тамаша мүмкіндіктер береді. Бұл ретте семейлік теміржолшылардың сүйікті спорттық ойындары – шаһар іргесіндегі қарағайлы орман ішіндегі шаңғы жарысы мен шаңғы эстафетасы.
Осы жылдың алғашқы спорттық ойындарын іргелі ұжым – Семей станциясы бастады. Кәсіподақ төрайымы Шәрбат Мейірманова бастаған 50-ден аса теміржолшы Ертіс өзенімен қылқан жапырақты орманның түйісер тұсындағы «Боровлянка» демалыс базасында қысқы спорт түрлерінен сайыстар өткізіп, «Көңілді старт», тюбингпен сырғанау сынды ойындармен демалыс күндерін қызықты өткізді. Әуесқой қыз-жігіттер бөлімшенің спорт нұсқаушысы Наталья Мешкованың жетекшілігімен мүлгіген қысқы орман ішімен шаңғы жолына шығып, өзара үздіктерді анықтады. Бұл ретте Салтанат Закариянова сынды шебер шаңғышылар ақпан айында өтетін бөлімше біріншілігіне жолдама алды.
Бұл тек бір ғана мысал, алда Семей жол дистанциясы, Семей локомотив пайдалану депосы сынды мекемелердің жекелей іс-шаралары жоспарда тұр.
Осы орайда ВЧД-23 спортшысы Мұрагер Қасымханов, ШЧ-29 мекемесінен Еркебұлан Тұрғамбаев, ТЧЭ-24 депосынан Арнұр Қожабеков, Жаңа-Семей жол дистанциясынан Темірлан Шыңғысов, Аягөз станциясынан Лаура Арғынбаева, НЖС-6 қызметкері Данияр Малдыбаев сынды бөлімшедегі желаяқ шаңғышылар өзге әріптестеріне шеберлік сабақтарын да өткізуде.
Айта кетерлігі, семейлік спортшылар республикалық бәсекелерде де биіктерден көрініп жүр. Мәселен, өткен жылдың соңында Бурабайда өткен ұлттық компания біріншілігінде Семей ЖТ бөлімшесінің теміржолшылары жалпыкомандалық есеп бойынша жүлделі екінші орынды айқын басымдықпен жеңіп алған болатын.