Семейлік теміржолшы жүзден жүйрік шықты
Абай облысы бойынша меншікті тілші
Жуырда Абай облыстық әкімдігінің ұйытқы болуымен Қазақстан халқы бірлігі күні мерекесіне орай «Бірлік жүгірісі» атты тақырыппен ерекше спорттық сайыс өтті. Аталған марафонға теміржолшылар да қатысты.
Он шақырымдық жарысқа теміржолшылар қауымы атынан Семей магистральдық желі бөлімшесі техникалық бөлімінің бастығы, әйгілі желаяқ, жеңілатлет Нұрлан Бегәділов қатысты. Осыған дейін де ұлттық компания ұйымдастырған сан түрлі сайыста топ жарып, алдына қара салмаған желаяқ жігіт ағасының бұл жолы да жұлдызы жанды. Өз жасы бойынша сынға түсіп жүлделі бірінші орынды айқын басымдықпен жеңіп алған теміржолшы кәсіби спортшыларды да артқа тастады.
– Бұл жеңіс мені алдағы көпсайыстарға жігерлендіріп отыр. Мәселен, осы мамыр айының 10 күні Қапшағай іргесіндегі Тамғалы тас аумағында «Tengri Ultra» трейл жүгірісінде бақ сынайтын боламын. Көпшілік теміржолшылар қауымының да спортты тұрақты түрде серік ететіндеріне, жеңіс тұғырын бағындыра алатынына куә болады, – дейді жүзден жүйрік атанған теміржолшы.
