Кәсіподақтың 120 жылдығына орай шағын футболдан турнир өтті

Кәсіподақтың 120 жылдығына орай Жамбыл жол бөлімшесі Шу және Тараз станцияларында шағын футболдан тораптық жарыстар өткізді.

Соңғы жылдарда шағын футбол бұқаралық сипат ала бастады. Бәсі биік бәсеке әр сала қызметкерлері арасында жиі ұйымдастырылатындықтан, еңбек ұжымдары арнайы команда жасақтап, дайындық жүргізіп тұратын болған. Оқу-жаттығу жиындары ретінде жолдастық кездесу өткізетіндері де бар.

Жамбыл жол бөлімшесінің кәсіподақ ұйымының спорт нұсқаушысы Евгений Тянның айтуынша, Шу станциясы, Шу электрмен жабдықтау дистанциясы мен Шу локомотив пайдалану депосы жақсы команда жасақтаған, дайындықтары жоғары. Ал облыс орталығындағы Тараз станциясы мен Жамбыл локомотив пайдалану депосының құрамасы турнирлерде қарсыластарға дес бермей келеді.  

Әйтсе де, жарыстың аты жарыс. Кейде кей командаға жеребе жолдас болып кететіні бар. Шу станциясында өткен бәсекеде қос мықты құрама Шу электрмен жабдықтау дистанциясы мен Шу локомотив пайдалану депосы теміржолшыларының арасындағы финалдық ойын тартысты өтіп, электриктердің жолы болды. 2-орынды машинистер олжалады. Ал ПЧ-47 Шоқпар жол дистанциясының командасы мықтыларға қарсы лайықты ойын өрнегін көрсетіп, үздік үштікті түйіндеді.

Тараз станциясындағы жарыста Жамбыл локомотив пайдалану депосының футболшылары жеңісті ешкімге бермеді. «ЖРС» ЖШС-нің еншісіне 2-орын тисе, Тараз станциясының құрамасы 3-орынды еншіледі.

Жеңімпаздар мен жүлдегерлер грамоталармен, кубоктармен, медальдармен және бағалы сыйлықтармен марапатталды.