Ақтөбеде теміржолшылар тартысты ойын көрсетті

Теміржолшылар әрдайым спорттық сайыстарда белсенді. Бұл жолы Ақтөбе бөлімшесі шағын футбол мен бильярд ойнап, сайысқа түсті.  

Ақтөбеде “ ҚАЗКӨЛІККӘСІП” кәсіподақ ұйымы төрағасының кубогі үшін бильярдтан және шағын футболдан іріктеу ойындары өтті. Бильярд ойындары бойынша жарыс алаңына 16 адам шықты. ТД Шұбарқұдық, ГВЦ, РЦУП, ШЧ-5, ПП”З”, ТЧЭ-2, вагонсервис командалары қатысты. Кәсіподақтың ұйымдастыруымен өткен жарыста бірнеше теміржолшы үздік нәтиже көрсетті.  

Ойын шарты бойынша ойыншы қарсыластан бұрын сегіз ұпай жинап, лузаға сегіз шар түсіру керек. Ойынның бұл түрінде 16 пирамидалық бильярд шарының стандартты жиынтығы 15 және нөмірсіз бір түсті шар қолданылады. Бірінші соққыны есептемегенде әрі қарай ойыншы үстел бетіндегі кез келген шарды ұра алады.  

Бильярд ойыны бойынша бірінші орынды Батыс аймақтық “Жолаушы тасымалы” бөлімінен Аслан Айтымбетов еншіледі.  

Ал шағын футболдан іріктеу ойындарына 8 командадан 80 адам қатысты. Мұнда өңірдегі барлық теміржол бөлімшелері  командалық ойынға шықты. Спорттың бұл түрі теміржолшылар арасында жиі ұйымдастырылады. Кәсіби спортшылардай машықтанып алған.  

Шағын футбол бойынша 1-орынды ТЧЭ-2 командасы, 2-орынды НЖС-11 командасы, 3-орынды ШЧ-5 командасы алды.

Жеңімпаздар енді өңіраралық сайыста бақ сынайды.