ҚТЖ – спартакиада чемпионы!

 «Самұрық-Қазына» АҚ компаниялар тобы арасында әртүрлі спорт түрлерінен Х спартакиада өтті. Тамыздың 8-10 аралығында жалауын көтерген мерейтойлық спартакиадаға Қазақстанның түкпір-түкпірінен өндірістік мамандық өкілдерінен құралған 14 командаға біріккен 1000 астам адам қатысты.    

Жыл сайын өтетін дәстүрлі спартакиадаға қатысушылардың саны ғана емес, сонымен қатар жарыстағы спорт түрлері де артуда. Мәселен, биыл бағдарламаға 14 спорт түрі кіріп, соның ішінде инклюзивті тәртіппен – дартс және үстел теннисі өтті және оған ерекше қажеттіліктері бар қызметкерлер де қатысты. Үш күн бойы жарыс алаңында корпоративтік рух, жеңіске деген ұмтылыс, ерекше көңіл-күйдегі аура сезіліп тұрды. ҚТЖ командасы жарысқа жоғары дайындықпен келгенін жарыстың алғашқы күні-ақ  көрсетті. Сұр мерген Самал Зұлпыхаров бәсекелестерінен жеңісті жұлып алып, ҚТЖ қоржынына алғашқы алтынды байлады. Алғашқы  жеңіс командалық рухты асқақтатып, басқа спортшылардың жеңіске деген құлшынысын күшейте түсті. Темір жолда тер төгіп жүрген нәзік жандар да осал емес. 

Садақ ату сайысында Махаббат Назарова күміс жүлдеге ие болып, ҚТЖ қоржынына тағы бір медаль сыйлады. Қажымұқан, Балуан шолақ, Иманжүсіп ұрпақтарының бір легі ҚТЖ-да жұмыс істейтінін теміржолшылар қол күресі жарысында дәлелдеп берді. Қара күш, табанды мінез, рухты ерік-жігерді талап ететін мықтылардың мықтысы қатысқан армрестлинг жарысында 80 келіге дейінгі салмақ дәрежесінде Нұржан Сағидоллинов пен 80 келіден жоғары санатта Жәнібек Кенжебаев үшінші орын мінберінен табылып, қола медальдар алса, екі қолда да мықтылығымен қарсыластарына дес бермеген Сымбат  Нәсіп 65 келі дәрежесінде, ал Алла Штрошерер 65 келіден жоғары санатта алтын медаль алды.  

Ұлттық ойын санатындағы асық ату – ептілік пен дәлдікті, тіпті сезу түйсігін талап етеді. Бұл ойында да компанияның асықшылар командасы сапындағы Қайраш Аханов, Мырзамұрат Қайыпбеков және Құндыз Есіркеп шебер ойын көрсетіп, үштіктің қатарынан табылып, екінші орынды иеленді. Салқынқандылық, стратегиялық ойлау және дәл есептеу. Теміржолшының күнделікті жұмысы барысында талап етілетін бұл қасиеттер Андрей Степанцов пен Жанар Қалдыбаеваға зияткерлік сайыс – шахмат ойынында көп көмегін тиігізіп, қола медальға қол жеткізуге  септігін тигізді. Семей қаласынан келген теміржолшы Рүстем Әлмұхаметов ерлер арасында дартстың дарабозы қатарынан табылып, күміс жүлде алды. Осылайша, бірінші күннің өзінде ҚТЖ қоржынында  3 алтын, 3 күміс, 4 қола медаль тулап жатты...

Ал спартакиаданың  екінші күні  де ҚТЖ командасы үшін алтыннан алқа тағумен  басталды. Суға жүзу жарысынан Лимаренко, Гордиенко, Алимина, Жеңісқызы сияқты шебер жүзушілері бар ҚТЖ құрамасы эстафетада жеңіс тұғырынан табылып, чемпион атанды.  Ал жеке дара жүзу жарысында жас ерекшеліктеріне сәйкес ерлер арасында  Константин Лимаренко алтыннан алқа тақса, Еркін Тұрысмағанбетов қола медаль иегері болды. Ал  Сағат Қабиев 40-44 жас аралығындағы ерлер арасында алтын алса, 50 жастан асқан ерлер арасында Геннадий Гордиенко  күміс медальға ие болды. Әнел Жеңісқызы 25-29 жастағы әйелдер арасында алтын алып, Х спартакиада чемпионы атанды. Жүзу жолағының толқыны алтынға айналған тағы бір жеңіс Татьяна Алиминаға бұйырды. Ол 50 жастан асқан әйелдер арасында чемпион болды.  

Шапшаңдық, ептілік, қырағылық үстел теннисінің «көзірі» болса керек. Міне, осы қасиеттерді тал бойына сіңіре білген Әлия Жанпейісова  әйелдер арасындағы үстел теннисі жарысында, ал Роман Халилов ерлер арасындағы сайыста алтыннан алқа тақса, екінші орынды да теміржолшы Ленара Смайылова жеңіп алды. Тоғызқұмалақтан ҚТЖ-ның алтынын қарағандылық теміржолшы Әли Исабеков алып берсе, қостанайлық Еркебұлан Тағыбергенов пен тағы бір теміржолшы қызымыз Айжан Серікова қола медальдар сыйлады. Қысқасы, теміржолшы қыз-жігіттер шеберлік, логика, дәл есептеуде де алдарына жан салмайтынын көрсетті. Екі күнде қоржынын 11 алтын, 5 күміс, 7 қола – барлығы 23 медальмен қоржынын толықтырған ҚТЖ командасы «Самұрық-Қазына» спартакиадасында сенімді түрде көш бастады.  

Үшінші күн жарысқа қатысушылар үшін шешуші күн болды. Темірдей ерік-күш пен командалық рухты ҚТЖ құрамасы футзалдағы шағын футболда көрсете біліп, қола жүлдені жеңіп алды. Бұл шынында жай қола емес, бұл командалық бірліктің, табандылықтың және жеңіске деген ұмтылыстың символы еді. Ерлер волейболында жеңіске  ұмтылған теміржолшылар темірдей мінез бен жігердің қандай болатынын көрсетті. Тарс-тұрс соғылған доптың дауысының өзі қарапайым адамға үрей үйірер еді. Бұл жарыста теміржолшы волейболшылар қола жүлдеге ие болса, қыздарымыз күмістен алқа тақты. Баскетболда бақ сынаған жас теміржолшылар  шапшаң шабуыл, берік бекініс, қуатты қорғаныспен үздік командалар қатарынан табылып, күміс медаль иегері атанды. ҚТЖ командасы жер мен суда ғана емес, виртуальді кеңістікте де мықтылығын дәлелдеді. Киберспорт ойынында құрметті 2-орын алып, күміс жүлдеге қол жеткізді. Бұл жеңіс тек компьютерде ғана емес – үйлесімді командалық рухтың, стратегиялық ойлау қабілеті мен жеңіске деген шынайы құлшыныстың белгісі еді.  

«Самұрық-Қазына» компаниялар тобы Х спартакиадасының шиеленіске толы, қызықты да жарқын үш күнінің қорытындысы бойынша «Қазақстан темір жолы» командасы жалпыкомандалық есепте 28 медаль, соның ішінде 11 алтын, 8 күміс, 9 қоламен  жеңіс тұғырына көтерілді.   Демалыс күндері екеніне қарамастан ҚТЖ командасының әр ойынына қызу әрі белсенді жанкүйер болған жүздеген теміржолшылар  үміті мен сенімі ақталды! Бұдан бөлек, ел өңірлерінде еңбек ететін  теміржолшылар онлайн дауыс беруге қатысып, ҚТЖ-ның «Ең әдемі спорт киім үлгісі», «Ең мықты команда», «Ең белсенді жанкүйер», т.т.  номинацияларда жеңімпаз атануына себепші болды. Спартакиаданың жабылу салтанатында «ҚТЖ-мықты! ҚТЖ-чемпион! ҚТЖ алға!» деп ұрандатқан дауыстар залды жаңғыртты. Спартакиада кубогы «ҚТЖ» ҰК» АҚ Басқарма төрағасы Талғат Алдыбергеновке табыс етілді.