Теміржол ардагерлері шағын футболда бақ сынады
"Қазақстан теміржолшысы" газетінің Жамбыл облысындағы меншікті тілшісі
Кәсіподақтар қозғалысының 120 жылдығына орай Шу машиналандырылған жол дистанциясы бастауыш кәсіподақ ұйымының ұйымдастыруымен ардагер теміржолшылар арасында шағын футболдан жарыс өтті.
Дистанцияда әр жылдарда еңбек еткен аға буын жарысқа алты бірдей команда қосып, тартысты ойын өрнегін көрсетті. Жалпы теміржолшы біткен физикалық тұрғыда үнемі ширақ жүретіні түсінікті. Ал спортта шынығудан бөлек тактикалық дайындық керек. Ұрпақтар сабақтастығын сақтап, түрлі турнирлерге алдыңғы толқынды да жиі шақырып тұратындығынан шығар, алаңда ардагерлердің бабында екені байқалды.
– Негізі спартакиада, турнирлерде командалар дистанциядағы цех бойынша бөлінетін. Ал ардагерлер бір ғана атау таңдап, санмен даралауды жөн көрген екен. Финалда «Шу – 2» құрамасы жеңіске жетті. Чемпиондарға есе жіберген «Шу – 4» 2-орынды қанағат тұтты. «Шу – 1» үздік үштікті түйіндеді. Жарыста үш командаға арнайы жүлде тігілді.
Ойыншылар арасындағы ең жасы үлкен Самат Құламаев – «Үздік қақпашы» атанып, арнайы жүлдеге ие болды. Үздік шабуылшы, қорғаушылар да сый-сияпатсыз қалған жоқ, - дейді Шу машиналандырылған жол дистанциясы бастауыш кәсіподақ ұйымының төрайымы Тоғжан Молдабаева.
Жарыс соңында жүлдегер командалар, үздік ойыншылар кәсіподақ ұйымының атынан арнайы кубок, дипломдармен марапатталды.
