Күзет қырандары – спартакиада чемпионы
«Қазақстан теміржолшысы» газетінің тілшісі
Қарашаның 15-23 аралығында «ҚТЖ» ҰК» АҚ орталық аппараты, филиалдары және еншілес ұйымдары қызметкерлері арасында спорттың төрт түрінен өткен спартакиада мәреге жетіп, жарыс жеңімпаздары марапатталды.
Биыл спартакиада волейбол, баскетбол, үстел теннисі және футзалдан өтіп, жалпы 717 адам қатысты. Атап өтерлік жайт, жылдан жылға спортқа қызығушылық білдірген теміржолшылар саны артып келеді. Мәселен, былтыр спартакиадаға 524 адам қатысса, биыл бұл көрсеткіш 193 адамға артып отыр.
Жарыс жеңімпаздарын құттықтауға келген «ҚТЖ» ҰК» АҚ Аппарат жетекшісі Ерлан Амандықов, салауатты өмір салтын ұстану денсаулықтың, нәтижелі еңбек пен тәртіптің кепілі болатынын атап өтті.
– Компания әрдайым осындай шараларды және оған белсенді қатысқан қызметкерлерді қолдап, көтермелеуге дайын. Бүгінгі жеңістеріңіз сіздерге шабыт, жаңа табыстар әкелсін, – деп ізгі тілегін білдірді Ерлан Мұратұлы.
Сонымен бір аптаға созылған спартакиада қорытындысы бойынша жалпыкомандалық есепте жүлделі үшінші орынды «ҚТЖ-Жүк тасымалы» ЖШС еншілесе, екінші орын мінберінен Магистральдық желі дирекциясының командасы табылды. Ал бірінші орынды «Әскерилендірілген теміржол күзеті» ЖШС командасы иеленіп, спартакиада жеңімпазы деп танылды. Жеңіс тұғырынан табылған командаларға кубоктар табыс етілді. Сонымен қатар денсаулығы сыр бергеніне қарамастан, спартакиадаға белсенді қатысқан теміржолшы Меңдібек Сұлтанұлы дипломмен және ақшалай сыйлықпен марапатталды.
