Семейлік теміржолшылар жеңіспен оралды
Абай облысы бойынша меншікті тілші
Семейлік теміржолшылар биылғы жылғы қысқы спорт түрлері бойынша ұйымдастырылып жатқан барлық деңгейдегі сайыстарда жеңіске жетуде.
Жуырда Астанада өткен «Самұрық-Қазына» АҚ компаниялар тобы арасында екінші қысқы спартакиада ойындарына «ҚТЖ-ЖТ» ЖШС Семей филиалының жеті спортшысы қатысып, бақ сынады.
Байрақты бәсекеде ұлттық компанияның туы астына жиналған кіл мықтылар арасында семейлік теміржолшылардың да қанжығасы майланып, мерейі үстем болды. Атап айтсақ, НЖС-6 бөлімшесінің өндірістік-техникалық бөлімінің бастығы Нұрлан Бегәділов пен Руслан Бекішев шаңғы жарысы бойынша сынға түсіп, екеуі де өз жас шамалары бойынша жүлделі екінші орынды иеленді. Жалпы саны 500-дің үстінде спортшылар жиналған айтулы шара бойынша бұл өте жақсы көрсеткіш саналады. Ұлттық компания бойынша барлығы 105 шаңғышының арасында топ жару оңай емес. Яғни семейлік қос спортшы ҚТЖ қоржынына әртүрлі деңгейдегі 16 медальдің түсуіне елеулі түрде үлес қосты дей аламыз.