Атыраулық теміржолшылар баскетболдан үздіктерді анықтады
Атырау облысы бойынша меншікті тілші
Салауатты өмір салтын ұстанған теміржолшылардың өмірі спортпен сабақтас. Тек салалық емес, қалалық, облыстық, республикалық деңгейде де жетістікке жетіп жүрген теміржолшы-спортшылар аз емес.
Жуырда Атырау қаласында «Қазтеміржолкәсіп» орталық кеңесі Атырау өңірі бойынша өкілдігінің және спорт нұсқаушыларының бірлесе ұйымдастыруымен баскетболдан «ҚАЗПРОФЖЕЛ-2026» іріктеу турнирі өтті. Турнирге 5 команда – ВЧДЭ-1, ТЧЭ-3, ЭЧ-4, ШЧ-8, ШЧ-9 командалары қатысып, өзара сайысқа шықты. Қарсыластың кедергісіне қарамастан допты қақпайлап алып жүріп, қашықтан, жақыннан нысанаға атып, торға дәл түсіру аса шеберлікті қажет етеді. Доп бірде дөп түсіп, бірде қапы кетуімен қызықты болып, ойын өте тартысты өтті.
Нәтижесінде 3-орынды ВЧДЭ-1, 2-орынды ЭЧ-4, ал жүлделі бірінші орынды ТЧЭ-3 командалары иеленді. Локомотившілердің көш басынан көрінуі бірінші рет емес, бұл жолы да ерледі.
«Енді бұл жеңімпаз команда «ҚТЖ» ҰК» АҚ бойынша баскетболдан өтетін жарысқа қатысып, өңірдің намысын қорғайтын болады», – дейді спорт нұсқаушысы Ринат Иманғазиев.
Жүлделі орын алған командалар турнир кубогы, арнайы дипломмен және ақшалай сыйлықпен марапатталды.